El 28 de payares el Teatru de La Llaboral de Xixón va acoyer la gala final del II Premiu Obdulia Álvarez «La Busdonga» d’Asturianada qu’entama’l gobiernu asturianu y, tres de les dos semifinales qu’acoyeron Mieres y Villaviciosa, esti domingu aporta la tercera y última d’estes fases previes a la final. La cita va ser esti domingu 26 d’ochobre a les doce del mediudía nel Teatru Filarmónica d’Uviéu.
Na tercer fase d’esti certame van participar Alicia Villanueva y María Latores na categoría femenina; César González y Raúl Díaz na categoría masculina; y na categoría moza Marina Carbajosa -ganadora del concursu nesta estaya na primer edición- y Mario González.
Les otres persones que compitieron nes semifinales anteriores d’esti premiu autonómicu de canción asturiana foron Cristina Sánchez, María Luisa Martínez, Lorena Corripio y Maribel Morán na estaya femenina; Isaac Sierra, Valentín García, Esteban Verdeja y Manuel Roza na estaya masculina; y Jairo Pérez, Bárbara Riesco, Lucía Fernández y Néstor Díaz na categoría moza.
La Conseyería de Cultura, Política Llingüística y Deporte creó en 2024 el Premiu Obdulia Álvarez «La Busdonga» d’Asturianada, una reconocencia destinada a promover y difundir la canción asturiana, una de les manifestaciones culturales más significatives del país que se declaró Bien d’Interés Cultural de calter inmaterial nel 2015.
El certame organízase en tres categoríes: femenina, premiada con 6.000 €; masculina, 6.000 €; y moza, con 3.000 €. Pueden presentase toles persones que quedaren seleccionaes ente les seis meyores clasificaes de los concursos llocales «Ciudá de Llangréu», «Ciudad de Oviedo», «Conceyu Siero», «El Comercio», «Valle del Narcea», «Valles d’Ayer» o «Villa de la Avellana».
Con esti premiu, el gobiernu asturianu busca reconocer y valorar «la tradición tan rica de l’asturianada y el llabor d’aquelles persones que caltienen viva esta forma d’arte», amás de «fomentar l’usu de la llingua asturiana, promoviendo la so normalización y espardimientu al traviés de la música». D’esta forma, el xuráu va evaluar el desempeñu de les persones cantantes teniendo en cuenta criterios como la conducta y actitú escénica, la entonación y afinación, la calidá d’emisión y dicción vocal, la ornamentación y matización; la dificultá y variedá d’estilos y la calidá llingüística. La primer edición ganáronla Lorena Corripio (categoría femenina), Carlos Velasco (masculina) y Marina Carbajosa (moza).
Suscríbite a les nuestres novedaes
