Torna la Nueche Celta Conceyu d’Ayer. El domingu 7 setiembre Soto va acoyer una edición nueva d’esti destacáu eventu que tuvo celebrándose ente 1996 y 2007, recuperóse en 2022 y entamó dos ediciones nesta dómina nueva. La del domingu va ser la tercera y nella toquen formaciones pernomaes de la música folk y tradicional asturiana: la Banda Gaites El Gumial, Herbamora, Llan de Cubel y Guieldu.
La xornada va arrancar a les 20h cola actuación de la banda gaites ayerana El Gumial; a les 21h toquen les pandereteres Herbamora pa presentar el so discu últimu 286 Llunes; mentes que la mítica banda folk Llan de Cubel sube al escenariu a les 22.30h. La nueche va zarrala’l grupu de música celta y new age Guieldu, nun conciertu nel que van presentar el so primer álbum Memories de Deva.
Esta nueche celta enmárcase dientro de les fiestes de Miravalles de Soto qu’ente’l 6 y el 8 setiembre van acoyer delles actividaes que van dende la puya’l ramu hasta verbena, chocolatada y xuegos infantiles. Ye una amuesa más de que les festividaes llocales pueden apostar por programaciones pa tolos gustos y con actuaciones musicales d’estremaos estilos. La xornada ta entamada pol Conceyu d’Ayer en collaboración cola comisión de fiestes, de la Banda Gaites El Gumial y el sofitu d’Asturies Cultura en Rede.
Suscríbite a les nuestres novedaes
