Dende’l vienres 11 al domingu 13 Mieres acueye l’Ochobre Folk, una de les cites más destacaes pa tola xente amante de la cultura tradicional, que se celebra dempués del so décimu aniversariu na cabera edición. Esti eventu entamáu pol Grupu Folclóricu Prau Llerón col sofitu del Conceyu Mieres va axuntar esti fin de selmana alderiques, pasucáis, conciertos, talleres, actividaes pa la reciella, baille y xinta y bebida’l país. Too ello nel Parque Xovellanos y con una mayoría d’actividaes de baldre.
La XI edición del Ochobre Folk arranca’l vienres 11 a les 19h col alderique Fronteres naturales, culturales y xeopolítiques. ¿Ónde ta la llende? ente Xosé Antón Ambás, Ramsés Ilesies, Soltxu Rodríguez, David A. Cáncamo y Guillerme Costa. Llueu, a les 20.30h, ye l’Alcuentru de Bandines pelos chigres de Mieres nel que van participar la Bandina Los Llerones, La Bandina d’Escontra, Os Netos do Escribano y la Bandina Tradicional «El Gaiteru»; y a les 22.30h ye la hora de fartucar cola Espicha Popular con un preciu de 20 €. Pa rematar esa xornada, a les doce hai Nueche en Danza coles yá mentaes bandines y escenariu abiertu pa quien quiera averase a tocar.
El sábadu 12 la cita entama bien ceo. A les 10h, con un preciu de 15 €, Santi Galguera va dar un taller dedicáu a los bailles d‘ente tierres. Al mesmu tiempu y pol mesmu preciu, Soltxu Rodríguez (Cantabria), David A. Cáncamo (Llión) y Xulia Feixoo (Galicia) van impartir la masterclass Pandereta na llende amosando la perspectiva de los sos territorios. Dos hores dempués, a les 12h y a les 13h, hai dos talleres de baille de baldre: el primeru, pa la reciella, a cargu de Luis Ángel Fernández; el segundu, astur-cántabru. A partir de les 18h, los grupos y bandes de gaites van desfilar peles cais de Mieres p’alcontrase dempués nel Parque Xovellanos.
Cuatro conciertos
A les 21.30h del sábadu entamen los cuatro conciertos que van allargase hasta’l domingu a meudía. La primera de les formaciones n’actuar ye la Orquestina La Xarangana, a la que van siguir Pandereteros d’Anguañu y el grupu cántabru Casapalma. La programación d’esti eventu remata’l domingu cola venta’l bollu preñáu, un pintacares -dambes dende les 12h-, l’actuación de Los Gascones -a les 12.30h- y el teatru pa neñes y neños Fechizocuentos d’Andrea Lobo.
Suscríbite a les nuestres novedaes
