El Coleutivu de Baille y Música Tradicional L’Enguedeyu entama esti fin de selmana la catorce edición de Seronda en Llangréu. La programación inclúi los conciertos de Buxane y 6 Riales; les actuaciones de música tradicional de la Bandina Trisquel y Grupu L’Enguedeyu, una charra de Fe Santoveña, entrega de premios y el primer Certame de Pintura Natural «Llangréu Patrimoniu Cultural, Industrial y Mineru».
L’eventu entama esti vienres 11 a les 19.30h nel Centru de Mocedá La Panera de Ciañu con una charra a cargu de Fe Santoveña sobre la Indumentaria na zona Centru d’Asturies. El sábadu les actividaes tresllándense a La Felguera. Les sos cais van esfrutar d’un pasucáis de la Bandina Trisquel y el baille de L’Enguedeyu dende les 12.30h. A les 19h entama’l Festival d’esta Seronda 14 nel Nuevu Teatru de La Felguera. Amás de L’Enguedeyu, n’él va participar el Colectivo Xeitu de Llión y Anabel Santiago, que va recibir un homenaxe col Enguedeyu de Bronce.
Pa la nueche del sábadu van tener llugar les tres actuaciones musicales de Seronda Anochar, a partir de les 22.30h nel CEIP Eulalia Álvarez Lorenzo. Van actuar el tríu l.lacianiegu de música tradicional Buxane, la formación de pandereteres 6 Riales y La Güeriata DJ. Esta última cita tien el preciu simbólicu de 1 €, anque quien participe en cualesquier de les otres actividaes gratuites d’esti programa nun va tener que pagar entrada. L’eventu cunta cola collaboración del Conceyu de Llangréu y ye una de les iniciatives venceyaes a la cultura tradicional que más tiempu lleva celebrándose na cuenca’l Nalón.
Suscríbite a les nuestres novedaes
