Xixón ye una ciudá que tien presente dellos nomes de la música asturiana nos sos espacios públicos. El monolitu n’homenaxe a Xulio Ramos, la escultura n’alcordanza de Manolo Carrizo, o’l xardín dedicáu al fundador de Los Xustos, Mariano Castro, son dalgunos exemplos. Ayeri la Sociedá Cultural Xixonesa emitió un comunicáu nel que pide que nel nuevu espaciu n’El Natahoyo, Naval Azul, haiga un «espaciu urbanu» dedicáu a Ígor Medio, fundador de Felpeyu, dibuxante orixinariu d’esti barriu xixonés y que nesti 2026 cúmplense venti años del so fallecimientu.
«Consideramos qu’esti allugamientu daría la reconocencia afayadiza a esta figura, ensin causar molesties y inconvenientes a los vecinos, al esistir na zona espacios de nueva creación anguaño non habitaos», sorrayaron dende la Xunta Directiva de La Cultural nel comunicáu que resume la trayectoria d’Ígor Medio y que recueye «razones sobraes pa dedicar un espaciu públicu nel so barriu natal d’El Natahoyo, tan venceyáu a la so biografía y la de la so familia, a Ígor Medio Tuya, en reconocencia a la so aportación a la vida cultural de Xixón y d’Asturies«.
Ígor Medio Tuya (El Natahoyo, Xixón, 1972-Zuya, Álava, 2006) foi un destacadísimu músicu en grupos folk como Felpeyu y dibuxante en numberosos periódicos y revistes de cómic. Un accidente de tráficu’l 24 de xunu de 2006 terminó cola so vida y la de Carlos Redondo, compañeru nel grupu musical Felpeyu, cuando diben camín d’una actuación en Barcelona. El gobiernu del Principáu d’Asturies dedicó-y la edición 2022 de la Selmana de les Lletres Asturianes pola so aportación fundamental a la cultura fecha en llingua asturiana y tamién Xixón entama cada dos años un ciclu de folk de cámara que lleva’l so nome. Apocayá, so madre, Sonia Tuya, cedió nun actu públicu tola so obra gráfica al Muséu del Pueblu d’Asturies.
La infancia d’Igor Mediu ta venceyada al barriu onde nació. So padre, Luis Medio, y so madre Sonia Tuya, yeren militantes comprometíos a favor de la democracia nel añu en que nació Ígor. Nació en xineru de 1972 y en setiembre d’esi mesmu 1972 Sonia y Luis fueron, xunto a otros homes y muyeres de la Sociedá Cultural Natahoyo, fundadores del Día de la Cultura, una fiesta de prau que supunxo un antes y un dempués nel asociacionismu xixonés. Amás, Luis y Sonia fueron decisivos nel movimientu vecinal del barriu dende l’Asociación de Cabeces de Familia y dende l’Asociación de Vecinos Atalía. «Dende neñu aprendió Ígor Medio’l sentimientu de pertenecer a un barriu -primero El Natahoyo, depués Montiana-, y el conceptu de compromisu social», sentencia la Sociedá Cultural Xixonesa nel so comunicáu.
Suscríbite a les nuestres novedaes
