Eva Tejedor: «Actuar con Vetusta Morla visibilizó’l papel tan importante que tien la pandereta na mio vida»
El pasáu 22 de xunetu Vetusta Morla -el grupu más renomáu de la escena indie estatal– actuó nel estadiu d’El Molinón de Xixón delantre de más de 2.000 persones. Nel escenariu tuvo presente la tradición sonora d’Asturies por mor de la que la formación madrilana convidó a Eva Tejedor & Les Pandereteres a interpretar con ellos el so nuevu single “Finisterre“.
Eva Tejedor cunta pa MUSICASTURIANA.COM que dende Vetusta Morla «buscaben da-y al cantar “Finisterre” matices de música de raigañu» y que por eso la llamaron pa collaborar nel conciertu de Xixón. La veterana panderetera valora qu’esti fechu «foi una gran esperiencia y una enorme oportunidá pa dar visibilidá al papel tan importante que la muyer y la pandereta tienen na tradición oral d’Asturies». L’artista sorraya qu’esto tamién da-y «reconocimientu» al instrumentu y qu’asina pue «amosar les sos posibilidaes non namás cola música de raigañu sinón tamién con músiques d’estremaes escenes, como nesti casu ye l’indie de Vetusta Morla».
