«Fame» ye’l segundu cantar qu’asoleya’l grupu de rap n’asturianu Mostru l’Horru

Dempués d’asoleyar «Fíu d’un pueblu«, el dúu de hiphop Mostru l’Horru publica’l so segundu single, «Fame«. El cantar afonda na so propuesta de rap-fusión y reivindicativu que’l propiu grupu presenta asina: «Mostru l’Horru naz col oxetivu de visibilizar la llingua asturiana dientro del xéneru urbanu. Lletres de rap consciente con una mecigaya de soníos enmarcaos nuna fusión innegociable con dellos estilos. Un proyectu novedosu y atrevíu, con un enfotu cultural y políticu mui claru: la normalización y l’espardimientu de la llingua asturiana ente’l públicu más mozu, con vistes a la tan necesaria oficialidá del idioma».