Homenaxe a Liseo Quiñones, “Gaiteru Mayor de L.lena”, esti domingu en Carabanzo

Esti domingu 14 d’agostu a les 19h, dientro de la programación de les fiestes de Carabanzo, va entamase un homenaxe a una de les figures más populares de la tradición y del folclore asturianu: Eliseo Quiñones, el Gaiteru Carabanzo, tamién conocíu como’l Gaiteru Mayor del Conceyu L.lena. Con 81 años ye ún de los gaiteros n’activo más veteranu del país y por eso y pola so trayectoria, vecinos, collacios y compañeros de profesión van homenaxealu con música, baille tradicional y, sobre manera, respetu, cariñu y almiración.

A les 18.30h va haber un desfile folclóricu peles cais de Carabanzo nel que van participar la Banda Gaites Güestia de L.lena y los grupos de baille La Flor de Xanzaina (L.lena), Folklore Ayerán y L’Artusu de Figareo. A les 19h ye l’homenaxe a Liseo Quiñones que va dar pasu, media hora dempués, a una tarde en danza amenizada pola Bandina’l Busgosu na que va haber escenariu abiertu pa que quien quiera pueda participar nesta folixa pal bail.le. Ye, a la fin, un homenaxe enllenu de tradición y emoción pa un gaiteru, fíu tamién de gaiteru, que lleva apegáu al instrumentu dende mediaos de los años 50 y qu’entá nun dexó de tocar, conviertiéndose n’ún de los gaiteros vivos más llonxevos d’Asturies.

Discos de gaita a la venta na tienda online