Yá ta en toles plataformes musicales el cenciellu y en YouTube’l videoclip de ‘Redobla‘, segundu adelantu del próximu EP de Ferla Megía, Páxaros 02. Esta pieza aporta dempués del anterior single, ‘Conseyu‘, y nesta ocasión el xoven músicu sierense entemez unes xiraldilles tradicionales de Colunga con un ritmu de reguetón y un sampléu d’Arca, la productora que más-y presta a esti artista, según reconoz.
«El cantar son unes xiraldilles prestosísimes de la zona de Lliberdón (Coluga) que deprendí d’una muyer, Rosa, qu’apaeció nun capítulu de Camín de Cantares. Pensé qu’un ritmu de reguetón pegaba-y bien y la verdá que producila foi facil, salió too mui natural. Lo único qu’eso foi en 2023 y llevo dos años mezclando y pensando a ver que facía col cantar», desplica Megía. Parte d’eses mestures ye la d’añadir na parte final un sampléu de la productora de música electrónica Arca.
Esti tema ve la lluz tamién xunto a un videoclip que nació asina: «el videu grabélu un día con Inés, que fuimos a la gueta y dempués editélu col after effects pa da-y un poco dinamismu», comenta esti músicu que’l vienres nel IV Reguerada Fest remata la xira de Páxaros 01; un tour qu’entamó nel III Semando Fest, que lu llevó a 18 escenarios d’Asturies, Llión y Madrid y col que ta acabante de ganar’l XVII Premiu Camaretá al Meyor Cantar con ‘Xatu‘.
El siguiente pasu ye Páxaros 02, EP que va publicar el 4 d’avientu y que «musicalmente sigue garrando influencies de tolos estilos posibles» que pasen pel «filtru» d’esti músicu qu’amesta soníos de la música electrónica, urbana, tradicional, pop y de la canción d’autor.
El próximu EP naz de seis temes que nun entraron por llargor nel EP Páxaros 01, va tener les collaboraciones de Tania Pereira, Rita Ojanguren y basa ún de los temes n’otru de Viva Belgrado. «Anque yeren canciones de primeres inconexes, llueu decatéme qu’había un puntu d’alcuentru: les referencies al monte, a los mios collacios, a los momentos fugaces, a los alcordances, a la frustación… y en definitiva a metáfores que munches veces facíen referencies a páxaros o a la fauna llocal«, añade Ferla Megía sobre esti trabayu del que’l próximu 27 de payares va poder sentise un tercer single.
Suscríbite a les nuestres novedaes
