Tres de llanzar la selmana pasada’l primer cenciellu d’adelantu, ‘L.LIXEROS’, Abéu sigue dando novedaes del que va ser el so primer álbum d’estudiu. El trabayu va entitulase K-MUDAR, yá pue vese la so portada y el cuartetu de música tradicional ta acabante d’anunciar una campaña de crowdfunding a traviés de Verkami cola que financiar los 4.000 euros que necesiten pa poder asoleyar el trabayu.
“K-MUDAR ye un proyeutu que pretende ufiertar una interpretación actualizada de la música tradicional asturiana dende’l soníu que nos identifica y que llevamos definiendo dende la creación del grupu en 2018, dende lo que somos, xirando tou al rodiu del relevu xeneracional, nel que confiamos y al que queremos poner en valor», despliquen Abéu nel testu presentación del crowdfunding d’un discu que’l grupu tien intención de grabar esti iviernu y publicalu na primavera.
Dientro de la plataforma Verkami pueden vese les distintes recompenses que pue recibir la xente que sofite económicamente’l proyectu poniendo dende 22 euros hasta 100 euros. L’álbum en formatu caxa + usb, dos modleos de camiseta, sudadera, abanicu, botella d’agua, tote y hasta un collar, unos perendengues y una pandereta artesanal fecha por Edu Llosa -guitarrista del grupu- son los productos que se pueden recibir faciendo mercando dalgún los distintos packs enantes del 20 d’avientu.
Suscríbite a les nuestres novedaes
