Ayeri domingu 24 de mayu finó Delfina Flórez a los 65 años d’edá, activista comprometida col movimientu de reivindicación llingüística, cola música tradicional, col feminismu y con otres causes rellacionaes cola xusticia social. La Xunta Pola Defensa de la Llingua Asturiana dio a conocer nes sos redes sociales la noticia de la perda d’una persona que dexa recuerdos «de ciñu, de bon tratu, de remangu» y sorrayen que foi d’ella la idea de crear Pandereteres pola Oficialidá.
«Siempre modesta y en segundu planu, ye’l momentu de dicir equí que foi de Delfina la idea de les Pandereteres pola Oficialidá. Escribió la lletra del ramu n’hospital y aquel añu 2009 nun pudo cantalu», comentaron dende la XDLA al empar que sorrayaron que «depués nunca faltó cola so pandereta a les cites reivindicatives, tamién a les marches feministes cuando éstes garraron la mesma idea pa la so causa».
Delfina Flórez participó tamién na escena musical asturiana formando parte del grupu d’investigación etnográfica L’Aniciu de Mieres. Con él grabó nos dos primeros discos de Muyeres y collaboró en temes de Boides y Lliberdón. Amás cantó y tocó na grabación del ‘Ramu del Día de les Lletres’, tema de Músicos pola Oficialidá que s’asoleyó en 2010.
«Delfa, tu, que tanto te gustaba la música tradicional, yá formes parte de la tradición coles tos cuartetes. Cuando les panderetes empiecen a ruxir nuna manifestación, el to recuerdu va tar presente», concluyó’l colectivu de reivindicación llingüística nel so comunicáu. La so esquela tamién destacó’l so amor pola música y el baille’l país, amás del so compromisu social y la so bondá.
Dende MUSICASTURIANA.COM llamentamos fondamente la perda d’esta compañera na llucha por tantes causes compartíes, agradecemos el so llabor y mandamos un abrazu fuerte a tolos sos familiares y persones cercanes.
Suscríbite a les nuestres novedaes
