El músicu uviedín José Manuel Blanco Espina, conocíu por facer parte de la formación Cuélebre, morría esti martes a los 72 años d’edá. Yá de bien mozu principió a participar en grupos como Los Bucaneros o Los Lider’s, dos bandes que tuvieron cierta sonadía na década de los 60. Sicasí, l’éxitu llegaría-y cuando funda Cuélebre -del que foi guitarrista y cantante– nel añu 1981, xunto a Beto García (voz y teclaos), César Marful (voz y baxu), Roberto Miranda (batería y percusión) y Berto Turulla (teclaos, pianu, secuenciador y coros).
La idea fundamental de la banda yera la de facer una música asequible a un públicu mayoritariu, con influyencies pop y d’aire asturianu, dalgo que quedaba reflexao nos arreglos con reminiscencies de la música tradicional/popular del país y del conocíu güei como Pop Llariegu. El so primer discu, tituláu Made in Asturies (1982), foi una especie de ponte ente’l Nuevu Canciu y lo que taba por venir na escena asturiana, nun momentu de cambiu nos gustos musicales que pasara de los cantautores a la denominada «movida», que n’Asturies centrábase fundamentalmente n’Uviéu (con bandes como Paso de Cebra, Modas Clandestinas o Salón Dadá). Espina, con Cuélebre, dio col estilu amañosu que lu llevaría a sonar nes daquella nacientes radiofórmules de la FM, especialmente col tema instrumental qu’abría aquel trabayu discográficu: «Tecno-Pericote», una adaptación de Berto Turulla sobre la conocida melodía cola que s’acompaña esi baille característicu de la zona oriental asturiana. Con él daríense a conocer a una audiencia bien amplia y de les radios pasaría a les discoteques, convirtiéndose nún de los poquísimos temes d’artistes asturianos que sonaríen en llocales d’esi calter.
En cuantes a les pieces cantaes, mandábense d’un asturianu afechiscu gracies a la collaboración nelles de xente como Carlos Rubiera o Avelino, provinientes del Nuevu Canciu; les temátiques xeneralmente yeren de tipu costumista, con referencies a los tópicos y el paisanaxe del país. Naquel momentu percuerren tola xeografía asturiana actuando en fiestes, romeríes y verbenes d’aldees, pueblos, villes y ciudaes que queríen baillar y disfrutar al son d’aquella nueva música asturiana.
Depués del impactu d’esti discu, del que vendieron miles de copies, quixeron da-y un xiru a la so música y publicaríen un segundu, de títulu Ave Fénix (1983), yá ensin Berto Turulla (morriera un tiempu enantes electrocutáu nun conciertu de la banda); nél pierden prácticamente toles referencies asturianes -llingüístiques, temátiques y musicales- pa ufiertar un soníu más mainstream y neutru, lo que los llevó a perder la so esencia y orixinalidá, nun volviendo a repetir l’éxitu del anterior. Tres años más tarde volveríen a retomar l’estilu que los diere a conocer con un trabayu de títulu homónimu, nel que recurren de nueves a la llingua asturiana y a les pieces populares pa inspirase, con él despidiríense de los escenarios.
El propiu Espina manifestaría años depués que’l motor de Cuélebre fuera llevar «el soníu tradicional del prau a la discoteca, ensin complexos y con arguyu»; nesti sentíu foron verdaderos pioneros, abriendo puertes y valtando prexuicios, de lo que vendría años más tarde na música asturiana.
Suscríbite a les nuestres novedaes
