Güei a mediudía foi’l funeral de Narciso Fernández Arduengo, «Chichi«, una de les figures que más puxó pola asturianada nel oriente d’Asturies. Nacíu n’Amieva hai 69 años, foi ún de los socios fundadores d’AICA (Asociación d’Intérpretes de Canción Asturiana), amás de promotor y organizador d’eventos, certámenes y festivales de canción asturiana; ente ellos el del conceyu onde nació, qu’entamó durante diez años.
Fíu de gaiteru y padre del tamién reconocíu gaiteru Óscar Fernández «Oscarín», «Chichi» finó esti miércoles en Collía (Parres). Dexa atrás un llegáu bien reconocíu, como amuesen los homenaxes recientes que-y ficieron n’Amieva, en Les Arriondes durante’l XXXI Certamen de la Castaña, en L’Infiestu o en Mieres, dientro del Memorial Silvino Argüelles.
Dende AICA, organización qu’ayudó a fundar, llamenten la so muerte con estes pallabres: «Persona intachable y indiscutíu dientro de l’Asociación, trabayador incansable en rellación al folclore asturianu en xeneral y a la canción asturiana en particular, mayestru, apoyu y collaciu de cantantes y gaiteros que güei arriquecen el nuestru patrimoniu, dexa un furacu que siempre va ser recordáu pero enxamás cubiertu». Dende Musicasturiana.com llamentamos esta perda y mandamos-y un abrazu a familiares y collacios.
Suscríbite a les nuestres novedaes
