El Muséu del Pueblu d’Asturies ta acabante d’anunciar la recepción d’un fondu de 500 grabaciones vieyes feches pol músicu Héctor Braga, quien les compiló durante dos décades nes sos xires per trés continentes. Dende’l muséu valoren mui positivamente qu’estes «valioses grabaciones faen medrar enforma la fonoteca del Archivu de la Música Tradicional» y añaden que «yá se pueden consultar nel repositoriu de los museos municipales de Xixón«.
«Toes estes grabaciones dixitalizáronse y restauráronse hasta’l so llímite técnicu pol propiu Héctor Braga», destaquen dende la entidá pública añadiendo qu’ente elles hai «formatos obsoletos como’l cilindru de cera o’l discu de pizarra» y que toes tán «inventariaes, descrites, catalogaes y puestes a disposición del públicu gracies a una ayuda económica del Gobiernu del Principáu d’Asturies pal estudiu, fomentu y difusión del patrimoniu cultural asturianu».
L’archivu ta formáu por 500 rexistros de temes asturianos, ente los que destaquen pieces inédites procedentes d’Alemaña, Suiza o Hispanoamérica, amás de dalgunos documentos «d’estraordinaria calidá sonora» grabaos ente 1900 y 1966 a históricos intérpretes como «El Gaiteru Libardón», «Cuchichi», «Miranda», «Claverol», «Botón», «Quin el Pescador», «El Panaderu», «El Maragatu», «El Presi», «Juanín de Mieres», «Xuacu de Sama», «Noriega», «La Busdonga», «La Pichona», «La Mariñana» y otros.
«El Muséu del Pueblu d’Asturies agradez a Héctor Braga esta importante y xenerosa donación, frutu de la so dedicación personal», declaró la entidá xixonesa en reconocimientu a esti cantante, multiinstrumentista, Doctor en Musicoloxía y profesor superior de música y etnomusicoloxía nos conservatorios d’Asturies y Castiella y Lleón. Braga, amás, foi ganador del Premiu Máximu Fuertes Acevedo d’Ensayu que concede’l gobiernu asturianu pola so obra Nel cantu la memoria. Ensayu sobre l’asturianada tradicional.
Suscríbite a les nuestres novedaes
