Ayeri xueves 21 de febreru la Sala de Cámara del Auditoriu d’Uviéu acoyó dende les 18h la presentación del nuevu proyectu discográficu de Forma Antiqva qu’axunta música académica y tradicional: De sópitu. Aarón, Pablo y Daniel Zapico conflúin nesti álbum, el so «discu más especial» -en pallabres del primeru d’ellos-, con Ruth Verona (violonchelu), Alejandro Villar (flautes y zanfoña), Pere Olivé (percusión) y Pablo García-López (tenor). El resultáu son venticuatro pieces -doce instrumentales y doce vocales- nes que la música de raigañu convive colos parámetros de l’académica en composiciones, arreglos y reconstrucciones enllenos de «orixinalidá, práctica histórica, frescura y inxeniu», como desplicaben nel actu. Trátase del primer llanzamientu de la formación col so propiu sellu discográficu que va tar disponible en toles plataformes musicales nos próximos díes.
María Herrero Presa, presentadora d’informativos de la TPA, foi la encargada de conducir la cita con De sópitu na que tamién participó, amás de los hermanos Zapico, l’escritor Ismael González Arias, que, según Aarón, foi «la llucecina qu’allumó’l proyectu». Nes sos intervenciones, comentó les sinerxes, conexones y anécdotes que xustifiquen la importancia y sensibilidá del proyectu, una «llocura» que demuestra que «la nuestra música tamién ye música clásica» y qu’amuesa «dalgo tan de casa tan propio y tan universal» nun resultáu «absolutamente impresionante».
«Ismael González Arias comentó les sinerxes, conexones y anécdotes que xustifiquen la importancia y sensibilidá del proyectu»
De sópitu, primero qu’un discu, foi un programa de conciertu que la formación estrenó nel Festival Internacional de Santander. El repertoriu que decidieron grabar ye una esbilla d’esa primer estaya del llabor que quier reflexar toles inquietudes, xéneros y formes posibles. Ente les venticuatro pistes que componen esti álbum únicu pueden sentise les sos interpretaciones d’once melodíes tradicionales asturianes xunto a dellos romances tradicionales cántabros -ún d’ellos declamáu-, cantares gallegos y irlandeses o soníos na llende ente dellos territorios. Toos estos exemplos de músiques identitaries, tradicionales y anónimes conviven con compositores como Händel, Purcell, John Playford, Gaspar Sanz, Santiago de Murcia, Nicola Matteis y Martín Códax.
Sorprenden, por poner dellos exemplos, l’últimu cantar, una versión del himnu mineru ‘Santa Bárbara Bendita’ enllena de respetu, solemnidá y emoción que suena envuelta nun acompañamientu instrumental cenciellu que xuega con una progresión dinámica y de testures; una improvisación al estilu d’un floréu de gaita qu’interpreta cola flauta Alejandro Villar na ‘Alborada’; y un ‘Saltón’ cuasique deconstruyíu que s’alloña de la estructura y temporalidá que requier el baille davezu.
«Nel discu pueden sentise les sos interpretaciones d’once melodíes tradicionales asturianes. Sorprenden la so versión del ‘Santa Bárbara Bendita’, un floréu con flauta na ‘Alborada’ y un ‘Saltón’ cuasique deconstruyíu»
La xera de documentación, como desplicó Pablo Zapico, responsable de la edición de les partitures, foi complexa, un llabor de «rata de biblioteca» nel que’l descubrimientu d’ayalgues como ‘La Asturiana’ del guitarrista barrocu Santiago de Murcia -qu’interpretaron na presentación Pablo y Daniel en directu- hebo acompañase con pruebes, adaptaciones, reconstrucciones y una búsqueda de sentíu dientro del repertoriu.
«La xera de documentación foi complexa, un llabor de descubrimientu d’ayalgues qu’hebo acompañase con pruebes y reconstrucciones»
Anque nun pudo tar presente presencialmente porque ta trabayando nuna producción d’ópera en Francia, Pablo García-López, la voz de De sópitu, quixo apurrir la so esperiencia nesti proyectu al traviés d’un videu. Del so trabayu vocal nel álbum, Ismael González Arias destacó delles veces la pieza ‘Que m’escurez’, que, según dixo, «nun ye una tonada pero nun dexa de ser en nengún momentu una tonada». Tocante al so llabor p’averase a esta música y buscar la so manera propia d’interpretala, el tenor cordobés comentó que tentó de «topar dalgo que nun ta na partitura», amás de mimetizase col entornu y les sonoridaes de les llingües nes que canta nel discu, ente les que predomina l’asturianu, tratando d’entender y reproducir les sos colores y acentuación.
De sópitu, amás d’inspirase nos cantares y soníos tradicionales asturianos, cuntó con un equipu de producción asturianu dafechu; foi «grabáu, diseñu y ideáu n’Asturies». La Sala de Cámara del Auditoriu d’Uviéu qu’agospió ayeri l’alcuentru colos músicos fízolo tamién mientres la grabación. A los mandos y la producción musical tuvo Fernando Arias, inxenieru de soníu y percusionista; na estaya gráfica, Ricardo Villoria. Sobre’l procesu de grabación, Aarón Zapico desplicó l’envís d’Arias y Forma Antiqva de caltener un soníu desenfadáu, frescu y llibre; dalgo que puede sentise a lo llargo del discu, refugando esi «correr tres de la perfección» constante que suel caracterizar el llabor de los músicos académicos. Confesaben ayer con arguyu que’l resultáu ye, a la fin, un «discu fondamente imperfectu» nel que punxeron en primer planu’l mensaxe y la emoción.
«El proyectu cuntó con un equipu de producción asturianu dafechu: grabáu nel Auditoriu d’Uviéu, producción musical de Fernando Arias y diseñu gráficu de Ricardo Villoria»
La presentación finaba pocos minutos dempués de les 19h reivindicando la necesidá de que s’afite dende les instituciones un acompañamientu a los proyectos musicales asturianos dientro y fuera de les fronteres del país. Aarón Zapico punxo’l ramu al actu dando anuncia de la próxima cita con De sópitu, el día 1 de xunetu nel tendayu del Muséu del Pueblu d’Asturies en Xixón, una oportunidá única pa esfrutar de la so «romería más qu’un conciertu». Forma Antiqva yá tien, amás, delles feches zarraes en festivales y sales d’Andalucía y Madrid p’amosar esti programa, De sópitu.
Suscríbite a les nuestres novedaes
