Dende esti vienres 21 d’agostu hasta’l domingu 23, La Pola Vieya, nel conceyu d’Ayer, celebra la Fiesta del Día de les Artes y los Oficios Ancestrales, una folixa con una montonera d’actividaes gastronómiques, teatrales, culturales, d’artesanía y musicales na que dellos artistes y agrupaciones de escena sonora n’asturianu tienen protagonismu. Asina ye como’l sábadu 22, el gaiteru José Manuel Tejedor, los grupos folclóricos Ayerán y Les Ayalgues d’Ayer, la Banda Gaites El Gumial y Pandereteras de Somiedo van actuar na llocalidá ayerana.
Ente la bayurosa programación, la música’l país entama a sonar el sábadu a les 14h coles agrupaciones llocales Ayerán y Les Ayalgues; a les que van siguir la Banda Gaites El Gumial -tamién d’esti Conceyu y qu’asoleyó apocayá’l so primer discu Aire na rampla-, y Pandereteras de Somiedo. Toes estes formaciones van desfilar pel pueblu a les cinco la tarde y repetir actuaciones a les 18.30h.
Yá pela nueche ye’l momentu de los conciertos. Nun primer momentu taba programáu’l de Nuberu pero, como anunció la organización nes sos redes sociales, el dúu «tuvo que suspender el so conciertu por mor del ingresu hospitalariu d’ún de los sos integrantes«. Sustitúyelos otru artista pernomáu de la música asturiana; el gaiteru avilesín José Manuel Tejedor que va actuar en formatu quintetu y facer un repasu a una trayectoria de más de 20 años que lu llevó a algamar los más prestixosos reconocimientos de la música tradicional, a actuar per tol planeta col grupu Tejedor y a facer unos trabayos y collaboraciones que trespasaron fronteres y estilos.
Amás de la xornada del sábadu, el domingu 23 d’agostu esta Fiesta del Día de les Artes y los Oficios Ancestrales tamién da visibilidá a otres músiques populares d’Asturies. Asina ye como na sesión vermú el gaiteru Vicente Prado «El Praviano» va dar un monólogu asturianu y tamién actúa la Banda d’Acordiones de Villoria. Too esto forma parte d’una programación festiva na qu’hai DJs, conciertos d’otros grupos, exhibiciones d’oficios tradicionales y varies comides populares. Un exemplu de la evidencia de que la música asturiana pue compartir perfectamente espaciu con otru tipu d’actividaes nuna programación festiva popular.
Suscríbite a les nuestres novedaes
