Los díes 18, 19 y 20 d’ochobre Morea va ser l’escenariu del FolkAyer, un eventu qu’axunta actuaciones de bandes folk asturianes, gallegues y anglo-irlandeses; alcuentru de bandes de gaites; asturianada; taller de baille, mercáu tradicional y gastronomía. Too ello dientro d’una carpa asitiada na zona del polideportivu, con entrada de baldre y serviciu d’autobuses ente Mieres, Morea y Felechosa tola nueche.
El vienres 18 a les 17h entama l’eventu cola apertura del Mercáu Tradicional qu’a lo llargo del fin de selmana va ufrir artesanía, xoyería, puestos de comida y actividaes pa la reciella. A les 18h ye’l taller de baille astur-gallegu y a les 20h un desfile con antorches que va dir dende’l campu Morea hasta la carpa’l festival. A les 22.30h entama la Nueche en Danza con Pandereteros d’Anguañu, Herbamora y la formación gallega Ailá.
El sábadu 19 ye l’Alcuentru de Bandes de Gaites que va entamar con un pasucais a les 17h y va tar siguío a les 18.30h poles actuaciones de la Banda Gaites Saxum de Xixón, la Banda Gaites Candás, la Banda Gaites Cabu Peñes, Lembranza Soplor (Galicia) y la Banda Gaites Escolinos d’El Gumial. A les 22.30h son los conciertos de la Nueche Folk cola participación de la Banda Gaites El Gumial -organizadora del festival xunto col Conceyu d’Ayer-, el grupu anglo-irlandés Flook y la formación asturiana de mecigayu-ska La Tarrancha. Pa rematar el FolkAyer, l’últimu día –domingu 20– va haber una muestra de tonada a les 13h y una xinta fecha pol Catering Asturcocteleros.
Suscríbite a les nuestres novedaes
