Falta un mes pa que la Banda Gaites Llacín asoleye’l so tercer trabayu discográficu, Resollu y esti yá pue acutase na tienda online de musicasturiana.com pa recibilu el mesmu día del llanzamientu. L’álbum ta formáu por doce temes que, en pallabres del codirector de la banda, Vítor Carbajal, ponen «un pie na tradición y otru na modernidá, busquen un soníu más potente de la banda y añaden propuestes sonores nueves que ruempen con tolo anterior». L’agrupación llanisca va publicalo en CD y tamién en vinilu, siendo la primer vez en décades que s’edita un discu de gaita asturiana nesti formatu últimu, faciendo d’él cuasique una pieza de coleccionista.
A lo llargo de 53 minutos esti trabayu axunta dellos estilos, qu’asina presenta Carbajal: per un llau hai «sets de pieces propies del repertoriu tradicional asturianu con arreglos de folk acústicu, que tamién s’amesten a otres melodíes del Arcu Atlánticu«. Tamién hai «composiciones nes que s’opta por otra llinia de soníu qu’inclúi baxu, batería y vientos metales» -el primer cenciellu ‘Resollu‘, enmárcase nesti son-. «Como contrapuntu presentamos otres propuestes nes qu’añadimos una llinia instrumental na que destaca’l pianu y el cuatru«, un exemplu d’ello ye una versión del míticu ‘Chan Chan’ de Compay Segundo. Resolllu recueye tamién pieces qu’inclúin programaciones electróniques y entemez temes compuestos por Vítor Carbajal, otros tradicionales y versiones como’l «homenaxe mui especial a Igor Medio y Carlos Redondo» con una reinterpretación de ‘Los fayeos de mayo’ de Felpeyu.
«Tamién ye de destacar l’apartáu vocal en tres de los temes, que nos permiten ufrir una propuesta más abierta de soníu, na que destaquen dos dances: una de Ponga y otra de Santa Marina de Parres (Llanes)», añade’l codirector d’esta banda de gaites que tien más de 50 componentes. Amás, el discu cunta coles collaboraciones de pernomaos homes de la música asturiana que formen parte d’agrupaciones como Llan de Cubel, Felpeyu, Corquiéu o Tuenda, ente munches otres: Lisardo Prieto (vigulín), Luis Nicolás (guitarra), Moisés Suárez (guitarra y bouzuki), Julio Rodríguez (bouzuki), Dani Álvarez (flauta travesa y bodhran), Pepín de Muñalén (flauta travesera), Miguel Herrero (viento metales), Israel Sánchez (batería), Sam Rodríguez (piano), Sergio Rodríguez (baxu y programaciones) y Xosé Antón Ambás (voz).
Resollu garra’l so nome del fenómenu natural que se da ente la roca y la mar provocando «la espulsión del aire en galeríes, escapando al esterior chorros d’agua de gran presión; una similitú cola fuercia de les gaites, les percusiones y los vientos metales», desplica Carbajal al rodiu un discu nel que tuvieron trabayando «dos años y mediu» ente l’estudiu de la Escuela de Música Tradicional de Llanes y los Tutu Estudios de Corvera, onde cuntaron cola producción de Lisardo Prieto y Sergio Rodríguez.
El 27 de xunu l’agrupación asoleya esti trabayu y el 4 de xunetu va ser la so gran puesta n’escena con un conciertu nel que la Banda Gaites Llacín va actuar con dellos collaboradores, dando como resultáu un espectáculu únicu con más de trenta músicos y bailladores n’escena.
D’esta manera, l’agrupación sigue dando los pasos que definen a una banda creada en 1998 nel conceyu Llanes pente los escolinos de la Escuela de Música Tradicional. Nesti tiempu xiró per países como China o Estaos Xuníos; actuó nos principales festivales del xéneru y algamó reconocimientos y premios. El repertoriu qu’executa fai un viaxe pel patrimoniu musical asturianu dende los vieyos temes tradicionales a los más actuales, pasando per composiciones propies y, en delles ocasiones, fusiones musicales con pieces de los paises que formen l’Arcu Atlánticu. Nel so tercer discu, Resollu, van afondar nesti llabor qu’abrieron discográficamente con Tornallás (2002) y Xideces (2008).
Suscríbite a les nuestres novedaes
