Pasó más d’un sieglu dende que Ramón García Tuero «El Gaiteru Lliberdón» participara na Exposición Mundial de París de 1889 pa representar al Estáu español. 136 años dempués, una banda de gaites va actuar per primer vez en Xapón y nesta ocasión va facelo pa representar a Asturies na Expo 2025 que se ta desendolcando anguaño n’Osaka. Ellí tán yá siete componentes de la Banda Gaites Villa de Xixón que van ufrir delles actuaciones en trés formatos estremaos; amás, nún d’ellos va mesturase la música asturiana al jazz xaponés.
«Camiento que too vien a cuenta del viaxe a Nueva York, del premiu a la meyor banda estranxera d’esti añu y de la repercusión que tuvo nos medios de comunicación y ente la xente», desplica José Luís García, director de Villa de Xixón, al rodiu la participación de la so banda nel eventu. El gaiteru cunta que, al poco de tornar d’Estaos Xuníos, recibió «una llamada de la Viceconseyería de Turismu«, que foi la que propunxo la idea de que representaren a Asturies na Expo Mundial d’Osaka. Asina ye como «una sección de la banda de gaites -porque tanto por espaciu escénicu como por tiempos ye complicáu llevar a la banda completa-«, va formar la delegación del gobiernu asturianu xunto a dos cocineros del restaurante uvieín Casa Fermín. D’esta manera’l Principáu escoyó a la música y a la gastronomía pa promocionar Asturies como destín turísticu nesti prestixosu eventu comercial y cultural.
Dende esti martes 7 hasta’l sábadu 11 los componentes de Villa de Xixón van ufrir les sos actuaciones en distintos espacios y formatos. Como esclaria García, per un llau van formar «una bandina tradicional, porque munchos de los músicos que toquen la gaita tamién toquen clarinete, saxu, curdión diatónica…» y nesti formatu dan-y visibilidá tamién al baille tradicional; pel otru tienen un formatu más de «banda de gaites, onde tenemos gaites y perscusión»; y pel otru ta’l más novedosu, un adaptación de espectáculu Cifuentes, Stoldtz y Cía. xunto a músicos xaponeses.
«Contactamos con músicos xaponeses porque nos paecía que’l conceptu de big band de Cifuentes, Stoldtz y Cía pegaba muncho col conceptu de la Expo, nel que tolos países lleven coses pa presumir de la so cultura. Nós llevamos la nuestra música asturiana colos nuestros temes y músicos xaponeses van tocar con nós estes pieces, qu’amás tienen arreglos de jazz, que ye una música americana que trespasó toles llendes y aportó a países como Xapón pa quedase, porque’l jazz xaponés creó’l so propiu camín», desplica Carlos Casado, componente de Villa de Xixón y tamién del grupu de jazz de raigañu Slum Suit, al rodiu esti formatu únicu de Cifuentes, Stoldtz y Cía. pa la Expo.
D’esta manera doce músicos xaponeses «de primer nivel» van compartir escenariu xunto cola representación asturiana pa facer esa mestura de temes asturianos con sones jazzísticos d’influencia xaponesa, «un trabayu que foi bastante grande d’organizar, teniendo en cuenta amás la diferencia horaria», como comenta’l director de Villa de Xixón. Sicasí, como él mesmu sorraya «ensin trabayu nun se pue aportar a estos sitios» y reconoz que’l «llabor bien fechu» que desendolca la formación que dirixe dende hai 25 años ye lo que los llevando a trespasar llendes y actuar per una montonera llugares de Francia, Bélxica, Italia, Portugal, Estaos Xuníos…
José Luis García confiesa que tán «mui nerviosos» con esti eventu nel qu’amás, esti miércoles 8, célebrase’l Día d’Honor d’Asturies nel Pabellón d’España, un actu que va cuntar cola presencia del embaxador d’España en Xapón, representantes institucionales y profesionales d’axencies de viaxes y turoperadores, y nel que los componentes de Villa de Xixón va interpretar un arreglu especial del himnu d’Asturies. Y anque’l director de la formación tenga la «pena de nun poder dir la banda al completo» por mor de los formatos y de los espacios, asegura que nun descarta «l’añu que vien poder pisar Xapón otra vegada cola banda al 100%«. L’escenariu de la Expo y tolo qu’esto supón pa esta banda de gaites, pa la música asturiana y pa la cultura del país, van contribuyir ensin dulda a abrir camín nesa parte del mundu.
Suscríbite a les nuestres novedaes
