Como tolos años, el branu xixonés ye’l que más programa música asturiana mesmo dende la iniciativa privada y asociativa como dende la pública. El Xixón Folk, les Xornaes Músico-Culturales, el Concursu de Canción Asturiana «El Comercio», l’Arcu Atlánticu, el Festival Internacional de Bandes de Gaites Villa de Xixón, el Concursu de Canción Asturiana «El Comercio»… son dalgunos de los exemplos que dende xunu hasta agostu enllenen la villa de Xovellanos de música de raigañu. Amás esti añu, la Semanona recupera los conciertos d’artistes venceyaos a la música n’asturianu na Plaza Mayor gracies a les actuaciones de Nacho Vegas y Marisa Valle Roso.
El referente de la canción d’autor y l’indie Nacho Vegas actúa esti miércoles 5 d’agostu a les diez de la nueche na Plaza l’Ayuntamientu, dientro de les actuaciones previes a la Semanona -na que tamién tán tocando otros grupos d’Asturies como Onza o Me Fritos and the Gimme Cheetos-. L’artista va presentar enriba l’escenariu el so discu nuevu Vidas Semipreciosas, el décimosegundu de la so trayectoria qu’inclúi trés temes n’asturianu dafechu: ‘Les ales’ (versión del himnu ‘Txoria Txori’ de Mikel Laboa), ‘Seis pardales’ (dedicáu a les 6 de La Suiza y nel que collaboren Rodrigo Cuevas y L-R) y ‘L’acabose’. La llingua asturiana tamién apaez de manera simbólica, nel cantar que-y dedica a Cristina Vegas, ma del cantautor, y que titula ‘Fíu’, y en ‘Deslenguarte’, nel que collabora Albert Plá.
Vegas, que ye ún de los cantautores más reconocíos dientro del Estáu español y de dalgunos países de Llatinoamérica, siempre amosó amás el so compromisu col asturianu y a lo llargo la so carrera asoleyó temes nesti idioma en solitario, en collaboraciones y xunto a otros proyectos musicales nos que participó. como Diariu -fechu a medies col músicu, escritor y realizador audiovisual Ramón Lluis Bande, y col qu’editó dos discos en 1997 y 1999-; o Lucas 15, formación cola qu’en 2007 publicó un discu de sonadía xunto a Xel Pereda (Llan de Cubel, Felpeyu) nel que reellaboraron temes del cancioneru popular asturianu dende una perspectiva de rock alternativu.
Per otru llau, el 12 d’agostu va haber más d’un eclipse en Xixón, porque Marisa Valle Roso va eclipsar la Plaza Mayor a les 13h cola presentación en vivo nesta ciudá del so álbum últimu, Cenicientes. La cantautora llangreana continúa asina una xira que la ta llevando a percorrer una montonera de llugares de tola península ibérica, a algamar dellos gallardones y reconocimientos -como la nominación nos Premios de l’Academia de la Música-, y ampliar el so públicu.
Too ello gracies al so bon llabor y a una propuesta musical y discursiva enrraigonada nel territoriu y cola qu’esta artista curtida na canción asturiana esplora tamién con otres sonoridaes como la de la música electrónica. Precisamente, los últimos temes qu’asoleyó, ‘Acebachi‘ y la remestura de ‘Al Molín‘ fecha por Llevólu’l Sumiciu, enmárquense nesta llinia sonora. Col conciertu de Xixón va amosar la so versatilidá y capacidá como artista.
Suscríbite a les nuestres novedaes
