La Ciudá nel Mar vuelve a la escena con ‘La fiesta de les serpientes‘, el so nuevu single, que vien acompañáu d’un videoclip oficial que yá ta disponible na so canal de YouTube. El llanzamientu confirma’l momentu creativu de la banda d’indie-folk y consolida la so apuesta por una propuesta musical con identidá propia dientro del panorama asturianu actual. En pallabres de la so vocalista, Marina Pangua, sirve d’adelantu pal primer álbum que va sacar la formación mientres esti añu 2026.
Esti cantar, sicasí, tien la peculiaridá de que ye l’únicu del futuru discu que nun se grabó en Tutu Estudios, sinón que se grabó con Pedro Vigil y mezclólu Paco Loco, nel so propiu estudiu de Cádiz y que foi l’home col que Nacho Vegas grabó los sos primeros cantares. Esta oportunidá débese a que la banda moza algamó’l premiu COMA 10. Tamién como premiu d’esi concursu, el cantar vien acompañáu de videoclip, grabáu y editáu por Cortexiphan Producciones.
«A esti tema tenemos-y munchu ciñu porque ye una de les primeres composiciones y tamos mui contentos de poder, por fin, velo grabáu y con una sonoridá mui indie«, cuenta Marina Pangua. El nuevu trabayu llega nun momentu de crecimientu pa la banda, que vien consolidando la so presencia na escena musical asturiana y que va marcar nesti 2026 un fitu cola espublización d’esi primer trabayu d’estudiu. Pa Marina Pangua, esti cantar ye mui especial, pero tamién difícil de definir. «Ta fechu d’imaxenes mui suxerentes y surrealistes… Ye un puzzle de lo que pue ser buscase a una mesma a los 20 años», concluye.
Suscríbite a les nuestres novedaes
