La tesis doctoral titulada Estudiu etnográficu de la interpretación de la flauta travesera de madera na escena folk urbana asturiana dende 2015, de la que ye autor Michael Walsh presentábase hai unos meses na Universidá de Shefield (Inglaterra). Nella estúdiase cómo s’utilizó la flauta travesera de madera pa espresar l’asturianidá y cómo al traviés d’esti instrumentu se reflexen elementos non musicales de la nuestra identidá. Tamién, identifica los tipos de flautes traveseres de madera emplegaes polos intérpretes asturianos y las característiques estilístiques y del repertoriu de la escena folk del país. Amás, trata sobre les construcciones d’identidaes venceyaes a la música celta asturiana y al resurdimientu folk, y cómo l’espaciu y el llugar configuren la identidá y la interpretación.
Trátase d’un estudiu percompletu pal que l’autor fixo entrevistes a nomes bien conocíos de la escena folk asturiana como Xosé Ambás, Rubén Bada, Paul Balmori, Borja Baragaño, Leti Baselgas, Llorián García, Pepín de Muñalén, Rigu Suárez, Diego Pangua o Guillermo Pérez, ente otros; amás documentóse tamién al traviés de programes como Al Son (RPA), series como D’ayeri a güei (TPA) o de musicasturiana.com.
Esti trabayu ye’l primeru que se fai sobre la importancia de la flauta travesera de madera na escena contemporánea de la música folk asturianu. En palabres del propiu autor: «La interpretación d’esti instrumentu nun contestu como l’asturianu y les construcciones d’identidá cultural nacional alredor d’él son un exemplu de cosmopolitismu celta enraigonáu». La tesis completa pue lleese equí.
Michael Walsh ye etnomusicólogu, profesor, flautista, vigulineru y compositor; nació en Manchester y creció en Stockport (Inglaterra), anque la so familia ye irlandesa. Tien una trayectoria musical bien sólida, foi Campeón Nacional de Flauta Senior y finalista nel Concursu Seán Ó Riada del 2016. Formó parte de distintos grupos, participando en varios espectáculos y collaboró na banda sonora del programa de televisión The Irish Empire, de la radiotelevisión pública irlandesa.
Hai unos años percorrió’l Camín de Santiagu y nesi caleyar conoció a un compañeru de viaxe asturianu col que fixo una bona amistá, hasta’l puntu de que lu convidó a la so boda equí n’Asturies. Nella conoció a dellos músicos folk del nuestru país y decatóse de les conexones cola so tradición musical irlandesa. Ye doctor del Departamentu de Música de la Universidá de Sheffield, onde s’especializó en música folk asturiana y tradicional irlandesa.
Tien publicáu un trabayu discográficu, tituláu Quarehawk (2019), nel qu’inclúi un tema del que faen parte dos melodíes asturianes, ‘Barralín/Pasacáis d’Uviéu’ con él al vigulín, Helen Gubbins al acordión de botones, y los asturianos Leticia Baselgas panderu y Rubén Bada al buzuquki. Anguaño ta trabayando nun álbum de flauta asturiana coproducíu por Rubén Bada y Michael McGoldrick.
Suscríbite a les nuestres novedaes
