Yá ta a la venta na tienda online de Musicasturiana.com y en toles plataformes musicales PUXA, el primer trabayu d’Ajo Band. Al frente d’esti proyectu ta Santiago Gutiérrez ‘Ajo’, veteranu gaiteru asturianu que foi componente de Trasgu, una de les formaciones pioneres del folk celta asturianu. L’álbum recueye siete pieces de música tradicional que, amás d’en formatu dixital, ven la lluz nun formatu físicu orixinal: un digipack que nun trai CD pero sí un llapiceru USB con toles pieces n’audio d’alta calidá.
«L’estilu ye asturgalaicu de gaiteros tradicionales con dalgo eléctrico qu’aporten los demás, pero ensin muncho ruíu», desplica ‘Ajo’ al rodiu les siete pieces que dan forma al discu: «Xotes, muñeires, marches, pasucais, valses, ritmos tradicionales… melodíes que sobreviven dende fai tiempu».
PUXA grabóse nos Tutu Estudios de Corvera baxo la producción de Sergio Rodríguez con una formación integrada pol mentáu Santiago Gutiérrez ‘Ajo’ a la gaita y flautes; Manuel Faustino al caxón; Alberto Ablanedo al bouzuki y J. Manuel Andrade a les tecles. Sergio Rodríguez amás de producir, tamién rexistra les guitarres y el baxu; y Álvaro Canga foi l’asistente de grabación d’estos temes iguaos por ‘Ajo’.
«El formatu USB ye por culpa’l coche«, desplica’l gaiteru y cabezaleru d’Ajo Band sobre por qué escoyeron esti formatu pa editar el trabayu físicamente. D’esta manera, esti grupu de música tradicional súmase a les bandes que, nestos tiempos de crisis del formatu físicu, tán escoyendo maneres nueves d’editar la so música y valtar dalgunes de les torgues que se tán poniendo al CD como que los vehículos o ordenadores yá nun incluyan llector de discos.
Suscríbite a les nuestres novedaes
