«La idea de Guieldu ye crear un grupu xoven, nuevu y dinámicu que traiga a l’actualidá les sonoridaes de la música celta de los 80 y 90»

Na seronda de 2019 presentóse a traviés de les redes sociales un nuevu proyectu de música asturiana, Guieldu. La formación ta anguaño grabando lo que va ser el so primer llanzamientu y que, en declaraciones a MUSICASTURIANA.COM del fundador, flautista y compositor de la banda, Héctor M. Aneiros, va tar formáu por «dos temes que sumen ocho minutos en total. Ún de ellos ye una versión d’una danza tradicional del conceyu Quirós ya otru ye un set de tres pieces irlandeses».

«La idea principal de Guieldu ye la de crear un grupu xoven, nuevu y dinámicu que traxera a la actualidá les sonoridaes de la música celta de los 80 y 90, la época del llamáu boom celta con artistas como Capercaillie, Dan ar Braz, Alan Stivell, Clannad o n’España Hevia, Luar na Lubre o Carlos Núñez», comenta Aneiros sobre l’oxetivu del so grupu, opinando amás qu’esta foi «una dómina mui marcada pola fusión d’estilos como’l new age qu’acercaben la música folk a tou tipu de públicos, incluso al qu’enxamás sintiera esti xéneru». Nesti sen, el fundador d’esta formación matiza que «pue dicise que Guieldu ye una banda “revival” que nun nagua namás por averar la música celta a los fans d’esta música, sinon tamién a xente interesao n’otros estilos como el folk-rock, new age, country, bluegrass, world music o pop». 

Esta xoven banda -formada por siete componentes que tienen ente los 19 y los 29 años– va asoleyar el so primer trabayu alredor del próximu mes de febreru. «Agora mesmo tamos inmersos na producción del cenciellu, sacáu alantre colos nuesos medios, ensin presupuestu, autoproducíu y grabáu nel nuesu local d’ensayu, en Blimea», comenta Aneiros d’estos temes que va amestar y masterzar Adrián Fernández (The Wild Blue Yonder). Llueu vendrán los directos, anque’l flautista y compositor avanza que pa velos en directo «habrá qu’esperar a la primavera-branu de 2022».

Comprar discos folk y celta na tienda online