La mala relixón d’escuchar punk nuna llingua minorizada

Sentite identificáu con daqué mientres la mocedá nun ye dalgo cenciello. Si a ello-y sumes lo de falar nuna llingua minorizada, la cosa tovía se pon peor. A mi, na adolescencia, diome pol punk. Grupos como The Clash, Sex Pistols, Cicatriz o Eskorbuto, ente otros, yeren los que sonaben pelos mios auriculares de camín al institutu. Sicasí, faltaba dalgo pa sentime identificáu dafechu. Entender lo que cantaben taba bien, pero nun yera na mio llingua.

Too esto cambió un día del añu 2017 que, nel aleatoriu de Spotify, saltó un cantar fechu n’asturianu y que sonaba a esi punk californianu que yo sentía pero que nun podía escuchar nel mio idioma. Yera ‘Foriatu na mio ciudá‘, un cantar que falaba precisamente de too esto que vengo comentando y que pertenecía al discu Invencibles, qu’asoleyaran nel añu 2015 nuna versión billingüe. D’entós p’acá, Misiva foi y ye unu de los mios grupos de cabecera.

Como siempre me diz Xicu Ariza, lo mio ye raro. Llegué al rock n’ast por Misiva y non como ye vezu na xente, qu’aporta a ello al traviés de grupos como Dixebra o Skama la Rede. Sí ye verdá que de pequeñu, cola mio familia, yá esuchara grupos como estos o Skontra, pero non na adolescencia, cuando realmente crees la to propia identidá.

Pue dicise que Misiva articuló parte de la mio mocedá y, como bon fan, entá guardo en casa delles púes y baquetes de la banda que garré en dellos de los conciertos a los que fui, dalgunos como simple asistente y, depués, col oxetivu d’escribir crónica y facer un bon reportaxe fotográficu, como asocedió nel conciertu aniversariu X+II n’Uviéu o en Grau, cuando la banda se despidió de los escenarios en casa.

El discu Mala Relixón ye unu d’esos discos qu’engloba de bona manera too esto que vengo cuntando, y ye que un cantar d’esti grupu dio nome al proyectu que, xunto con Yedra Riesgo, empezamos na Universidá d’Uviéu, depués tresllademos a Radio Kras y acabó nes ondes de la RPA, el podcast Héroes ensin nome. ¿Por qué esi nome? Mui cenciello. L’oxetivu que nos punximos yera dar a conocer proyectos culturales que se fixeren n’Asturies, ser un altavoz de la inquietú cultural d’un país que tien muncho más de lo que se ve a simple vista. Ellos yeren, entós, los Héroes ensin nome. Y sí, Misiva tamién pasaron pel programa, nun capítulu especial que zarraba la temporada y nel que dieron un miniconciertín.

Como esti discu de Misiva ye quiciabes unu de los mas importantes pa mi y tres l’anuncia en menos de trés años de la retirada de los escenarios de la propia banda moscona y les dos bandes amigues Desakato y Mala Reputación, afondamos agora nesti trabayu d’estudiu singular, yá que ye una compilación de singles y un EP, amás d’una parte audiovisual. El trabayu d’estudiu ta compuestu, en total, por 10 cantares qu’analizamos darréu.

• ‘Mar Adientro’ – Ye probablemente la puerta d’entrada más clara al conceptu del discu. Frente a la tendencia del punk de mirar siempre hacia fuera —escontra’l sistema, escontra’l poder, escontra’l que oprime—, Misiva fai equí’l movimientu contrariu: mirar hacia dientro. El cantar fala de volver al orixe y romper con aquello que t’impide ser quien realmente yes. El propiu grupu definióla como «un viaxe hacia adentro». Musicalmente ye una de les piezas que meyor resume’l cambiu de Misiva nos sos últimos años: sigue teniendo esa contundencia punk-rock, pero hai una intención más atmosférica y emocional. Nun ye tanto un cantar pa señalar culpables como pa plantease qué parte de lo que somos construyímos nós y qué parte nos foi impuesta. Cuenta amás con un videoclip dirixíu por Titi Muñoz.

• ‘L’Arbol’ – Si ‘Mar adientro’ plantea’l viaxe hacia unu mesmu, ‘L’árbol’ cuestiona qué hai detrás de lo que creemos ser. Ye un cantar sobre les idees que vamos incorporando y que damos por verdaderes ensin preguntanos d’ónde vienen. La imaxe del árbol funciona como metáfora central: buscar la verdá nun significa necesariamente atopar una respuesta definitiva. Más bien consiste n’entrar nel procesu de conocese. El grupu mesmo rellacionó’l tema cola construcción de la personalidá a partir d’idees que pueden nun ser realmente nueses. Ye, probablemente, una de les lletres más reflexives del trabayu y una muestra de que la reivindicación de Misiva nesta etapa nun pasa namás pol discursu políticu, sinón tamién pola reivindicación individual.

• ‘Mala relixón’ – El cantar que da títulu al discu ye, en cierta manera, la declaración de principios. Pero la mala relixón de Misiva nun ye una relixón concreta. Ye’l conxuntu de patrones, convenciones y idees que se nos van instalando dende pequeños: familia, escuela, medios, redes sociales… Lo interesante ye que la crítica nun se formula únicamente como una denuncia. Hai una invitación a desmontar esos mecanismos y recuperar la capacidá de decidir por nós mesmos.

• ‘La cárcel’ – A esti cantar tengo-y especial ciñu, yá que la estrenaron en primicia nesi miniconciertín del que falaba enantes. Nesti cantar la prisión funciona como metáfora de les llimitaciones que nos imponemos o que nos imponen. Ye tamién un bon exemplu de cómo Misiva consigue que’l discursu social y políticu de la banda tenga una dimensión personal. La cárcel nun tien por qué tener barrotes; puede ser una forma de pensar, una rutina, una rellación cola que nun somos felices o una identidá que sentimos que tenemos que representar.

• ‘La misiva’ – Equí apaez una de les claves fundamentales pa entender qué ye Misiva como banda. La propia idea del nome del grupu nació de la intención de convertir cada canción nun mensaxe: una misiva que sirviera pa denunciar, facer reflexionar o poner sobre la mesa dalgún tema. Musicalmente ye una de les pieces más directes y combatives del repertoriu. Y funciona como una especie de recordatoriu de la trayectoria anterior del grupu: frente a la introspección d’otros cortes del discu, equí recuperen con más claridá’l espíritu de punk como ferramenta de intervención. Esti cantar vien, amás, con un videoclip dirixíu por Titi Muñoz y grabáu nun mesmu planu secuencia y nel que, mientres los músicos toquen, van asocediendo delles coses.

• ‘Esclavos del momentu’ – Como ‘La cárcel’, esti fue l’otru cantar qu’asoleyaron nel miniconciertín. El propiu títulu yá marca una de les esmoliciones del álbum: la dificultá pa vivir fuera de la inmediatez. Nun ye difícil rellacionala cola dependencia de les redes, la necesidá de consumilo too rápido y esa sensación de tar permanentemente pendientes de lo que pasa fuera.

• ‘Héroes ensin nome’ – Equí les esplicaciones, a nivel personal creo que nun son necesaries. El cantar que dio nome a, probablemente, el proyectu más importante na mio vida hasta’l momentu. Equí Misiva lleva la mirada hacia les persones que lluchen ensin reconocimientu, como nós tratemos de facelo col podcast. El conceptu de «héroe» pierde la dimensión épica habitual y pasa a representar a esa xente que sigue resistiendo ensin esperar premios nin homenaxes. Echo en falta cantala con ellos en directo y que se crucien les miraes con Humber nel so estribillu.

• ‘Qu’arda’l sol’ – Ye unu de los cortes onde vuelve aparecer con más fuerza la dimensión de ruptura y tresformación. El fueu, presente nel títulu, funciona como elementu de destrucción pero tamién d’anovación: pa que daqué nuevo pueda apaecer, primero hai coses que tienen que dexar de ser como yeren.

• ‘Ensin gravedá’ – Si bona parte del discu fala de romper cadenes, esti cantar representa probablemente’l momentu nel que yá nun pesen tanto. Ye un cantar sobre lliberase, sobre dexar atrás aquello que condiciona y recuperar cierta sensación de llibertá.

• ‘Celebrar’ – El zarru ye especialmente interesante porque, depués d’un discu que pasa bona parte del tiempu cuestionando patrones y condicionamientos, Misiva termina con un cantar que mira hacia la celebración. Nun ye una celebración inocente. Ye más bien la recompensa conceptual de tolo anterior: depués de mirar hacia dientro, cuestionar lo aprendiío y intentar romper coles cárceles personales, queda celebrar aquello que somos.

Lo más interesante de Mala Relixón ye que Misiva nun abandona’l punk reivindicativu, pero cambia’l llugar dende’l que fai la reivindicación. Nos primeros trabayos la mirada taba mui enfocada hacia’l conflictu social y políticu; equí’l conflictu tamién ta dientro de cada persona. Amás, ye importante contestualizalu dientro de la evolución sonora de Misiva. El grupu señaló que con esti trabayu quería alloñase de la oscuridá y rabia de los primeros discos y averase a un soníu más próximu al de La Misiva, con riffs más cuidaos y una perspectiva más introspectiva.

Pa dir rematando ye imprescindible cuntar como empezó tou esti discu que s’espublizó nel añu 2023, pero qu’empezó a crease nel añu 2020. Ye L’últimu aliendu, el curtiumetraxe de 17 minutos que tamién da nome al EP que se sacó al mesmu tiempu.

Dirixíu por Titi Muñoz, construyíu alredor de trés cantares: ‘Esclavos del Momentu,’ ‘Héroes Ensin Nome’ y ‘Qu’Arda’l Sol’. Estrenóse n’abril de 2020, nel marcu del décimu aniversariu de la banda. Misiva pensara facer un videoclip pa caúna d’elles, pero’l realizador Titi Muñoz propunxo convertir esi material nuna historia única.

La historia plantea un escenariu de calter postapocalípticu y parte d’una idea bastante clara: mostrar hasta ónde puede llevar el ritmu de vida de la sociedá actual y la forma na que’l ser humanu ta frayando’l planeta. Pero’l discursu nun queda nel catastrofismu. Misiva quería dexar abierta una salida, una posibilidá de cambiar el rumbu.

Misiva yá nun pisa los escenarios, pero los integrantes sí que tán n’otros proyectos musicales. Sicasí, la historia recién del rock n’ast nun pue entendese ensin el so papel. ‘Foriatu na mio ciudá’ ye yá un himnu xeneracional como Misiva ye parte de la historia musical d’esti país. Gracies.