El 15 de febreru foi l’estrenu d’una banda nueva, LÏBRE. Esti grupu ta creáu por componentes de Misiva, Mala Reputación, Desakato y Origen; esi mesmu día dieron el so primer conciertu teloneando a Pablo Senator en Xixón y llanzaron el so primer EP, Ciudadano Lunar. El trabayu -que yá ta a la venta y en plataformes musicales– contién seis temes con influencies que van dende la canción d’autor al pop alternativu, sobre la base sólida d’una banda de rock. Dos d’ellos tán n’asturianu: ‘L’Ablugada’ y ‘Acabalgamos’.
«‘L’Ablugada‘ fala de la pérdida; ye una historia con protagonistes con nome y apellíos, que puede tener otres llectures dende’l puntu de vista del duelu», desplica Óscar G. Nuño, guitarrista de la banda. «No musical, quiximos que sonara como una canción piquiñina, con pocos elementos, pa que l’atención se centrara na melodía y nel testu». Nesti sen, el músicu comenta qu’hai «un patrón rítmicu constante nel que van apaeciendo otros elementos hasta llegar al estribillu, que se vacía casi por completu. A la fin, la canción ruempe, coincidiendo cola referencia llírica a la batalla que llibra cada persona«.
D’otra banda, el que fora tamién componente de Misiva, presenta ‘Acabalgamos‘ como «una referencia a la vida xabaz; un discursu qu’inclúi unos versos recitaos del poeta Joako Eskaso como reconocencia a la militancia, al sacrificiu que supón participar nun colectivu social y tener una visión del mundu altruista y solidariu«. En cuantes a la música, el guitarrista sorraya que «ye’l cantar más distintu del EP, introduz soníos con menos distorsión y muncha reverb, amás d’otros elementos como sintetizadores, lo que fai que’l cantar xuegue en sonoridaes próximes a la música discu de los años 80″.
Ciudadano Lunar foi grabáu y producíu por Pablo Senator en Ovni Estudio (Asturies) en xineru de 2025. Los diseños del EP tán creaos por Rubén Fernández a partir d’un mural del reconocíu artista Marat Morik y, como carta de presentación, llanzaron el videoclip de ‘Veinte años’, dirixíu por Ingrave Estudio. Los sos componentes son vieyos conocíos de la escena rockera del país; toos ellos de grupos -sacantes Misiva- qu’anque mayoritariamente en castellanu, siempre fixeron dalgún tema n’asturianu. Esi compromisu cola defensa y l’usu de la llingua asturiana caltiénse agora en LÏBRE, anovando’l soníu del rock fechu nesti idioma.
LÏBRE ye grupu ta creáu por componentes de Misiva, Mala Reputación, Desakato y Origen. El so primer EP, Ciudadano Lunar, ye un trabayu que contién seis temes con influencies que van dende la canción d’autor al pop alternativu, sobre la base sólida d’una banda de rock. Dos d’ellos tán n’asturianu: ‘L’Ablugada’ y ‘Acabalgamos’.
Hay existencias (puede reservarse)
Suscríbite a les nuestres novedaes
