Yá ta a la venta en Musicasturiana.com Fabada. Historia y simbolismu d’un iconu asturianu, la última creación de la editorial xixonesa La Fabriquina. Trátase d’una obra colectiva de 170 páxines que propón un recorríu únicu pela historia d’esti platu y, sobre manera, pela so evolución como iconu y símbolu identitariu. El llibru analiza los aspectos trescendentes del platu: dende’l so orixe como eventu social, hasta’l so impactu en contestos como l’arte, la publicidá y tamién la música, con un capítulu dedicáu al cantar popular ‘Baxaben cuatro ayeranos‘, que cunta cola collaboración d’Héctor Braga.
La obra, firmada por Alicia Álvarez y David Guardado, editores del volume, cuenta tamién cola participación de persones conocíes del ámbitu asturianu en distintos campos: los historiadores Arantza Margolles, Xuan F. Bas Costales y José Luis Carmona, el gastrónomu Lluis Nel Estrada, el comunicador David Castañón y el periodista Damián Barreiro (fináu va poco), que, dende distintos puntos de vista, consiguen capturar colos sos análisis el rellumu d’esti fenómenu social pol que se conoz a Asturies, nel que s’autorreconoz la sociedá y col que les asturianes y los asturianos se presenten fuera del país.
El volume, de tapa dura y gran formatu, revela datos nuevos sobre les primeres referencies al platu, adelantándose delles décades a les menciones conocíes hasta agora, y desendolca una teoría nueva sobre’l so orixe. Ta formada por un trabayu documental impresionante que cuenta, amás, con un diseñu modernu y un ampliu conteníu visual, nel que s’inclúin semeyes, prensa y obres de dellos artistes asturianos.
La presentación de Fabada. Historia y simbolismu d’un iconu asturianu va ser el xueves 29 de mayu na Casa Natal de Xovellanos a les 19 hores. La obra yá ta en llibreríes y, gracies al so capítulu dedicáu a ‘Baxaben cuatro ayeranos’ pue mercase tamién na tienda online Musicasturiana.com, na so oficina de Xixón y nel puntu de venta que tien na tienda de Puru Remangu n’Uviéu.
Suscríbite a les nuestres novedaes
