Esti martes 29 d’abril preséntase a les 19h na llibrería Matadero Uno d’Uviéu, el llibru Agenciamientos ecológicos, un volume multidisciplinar que recueye una docena d’ensayos sobre l’autodetermín ecolóxicu nun presente asoláu pola crisis climática. Nel llibru participen autores de gran proyección internacional, voces destacaes del ámbitu estatal y, completando’l volume participa tamién el musicólogu asturianu Llorián García Flórez, con un testu rellacionáu col so trabayu de tesis doctoral, centráu na escucha de la nueche en danza y na que rescata’l poder del cucho como elementu d’articulación radical.
Esta obra coral ta impulsada por Concomitentes –una plataforma dedicada a facilitar procesos artísticos entamaos y xestionaos por colectivos sociales autónomos–, y el llibru cuestiona’l greenwashing característicu de les aprosimaciones dominantes a la cultura y propón abrir un debate colectivu sobre’l papel del arte na xeneración d’aliances más qu’humanes frente a la debastación ecolóxica.
El testu de Llorián García defende esa visión del cucho como elementu d’articulación radical: llugar d’intercambiu colos seres del suelu y que cuestiona delles premises problemátiques que tán na base mesma de la esfera pública (pos)franquista asturiana. Nun exerciciu d’asturfabulación crítica –inspiráu nel trabayu d’autores como Donna Haraway, Vinciane Despret o Úrsula K. Le Guin–, el cucho reaparez pente les resquiebres de la ciudá posfranquista p’afitar una diplomacia multiespecies, más allá del vía póstuma de la cosmoloxía estractivista.
La presentación va celebrase na llibrería Matadero Uno, un espaciu independiente d’Uviéu que se tien afitao como referente del llibru y del ensayu contemporáneu, y que funciona tamién como llugar de xunta y activación cultural. Nel actu van participar l’autor del capítulu del cucho, Llorián García; l’editor del llibru, Fran Quiroga (coordinador de Concomitentes y impulsor d’O Gabinete); y l’antropóloga Verónica Calvo, investigadora del CNRS-EPHE de París, reconocía especialista na ecoloxía del enraigonamientu
Amás de la visión asturiana, n’Agenciamientos ecológicos escriben nomes de renome internacional como Marisol de la Cadena –figura clave del xiru ontolóxicu n’antropoloxía–; l’activista trans Graham Bell Tornado; la filósofa finesa Elisa Aaltola; la dramaturga y curadora Katalin Erdődi; l’artista visual Antje Schiffers; o l’investigador Michael Marder, conocíu pol so trabayu sobre’l xiru vexetal n’humanidades.
Tamién s’inclúin persones de prestixu del ámbitu estatal, como la antropóloga y pensadora ecofeminista Yayo Herrero; los investigadores Brais Estévez Vilariño, Tomás Sánchez Criado y Christian Alonso; y mediadores culturales como Natalia Balseiro, Alfredo Escapa, y un testu colectivu de la propia plataforma Concomitentes qu’edita’l llibru.
Suscríbite a les nuestres novedaes
