La Nueche Celta de Cabranes y la Tarde Folk de Xixón protagonicen los eventos del fin de selmana

La música asturiana nun garra descansu y esti fin de selmana tamién va haber dos cites bien destacaes colos sones del país: la Nueche Celta de Cabranes y la Tarde Folk nel Muséu de Xixón. El primer de los eventos va ser el vienres 14 en Santolaya y el so cartelu axunta a ún de los nomes más históricos de la música asturiana, Llan de Cubel, xunto con otru muncho más nuevu y que más sonadía ta garrando nos últimos tiempos, Algaire. L’eventu va arrancar a les 21h y afonda nel revival que ta habiendo estos últimos meses de cellebraciones de nueches celtes per tol país.

Y como la música asturiana pue baillase a toes hores, Xixón acueye’l sábadu 15 un eventu que reivindica unos horarios más “familiares” pa esfrutar de los soníos de raigañu. D’esta manera el Muséu del Pueblu d’Asturies va acoyer la Tarde Folk nel Muséu na que va haber música en directo dende les 17h hasta les 23h. El folk de cámara del dúu ribeseyanu Baxel va abrir l’eventu a les cinco la tarde, pa dar pasu a les 18.30h a la formación bal-folk La Bonturné, siguíos d’otros históricos, Felpeyu, que van xubir a les 20h al escenariu. L’eventu remata a les 22h cola actuación bandina xixonesa Xe de Jota.

Otros cinco conciertos

Amás d’estos dos cites qu’axunten seis actuaciones musicales en total, va haber más conciertos de música asturiana esti fin de selmana. Güei xueves 14, vuelve la música en directo al Tierra Astur El Vasco d’Uviéu y nesti restaurante van actuar la bandina La Curuxa; el sábadu 15 Eva Tejedor & Les Pandereteres van tocar nel Nuevu Teatru La Felguera dientro de la XIII Seronda; el tríu folk acústicu Loína toca na Casa la Cultura de Llanes; y nel 1er Mercáu de los Alimentos del Paraísu, en Rusecu, van tocar Anabel Santiago‘l sábadu y Calea‘l domingu. Tola información de los eventos ta n’Axenda de musicasturiana.com

*Na semeya, la bandina Xe de Jota.

Discos de música tradicional y folk a la venta na tienda