Asturtralla asoleya’l cantar “Dios salve al Rei”, versión de “God Save The Queen”

Dempués d’asoleyar l’añu pasáu l’EP Asturtralla 2.0, punk-rock astur Asturtralla vuelve a llanzar un cantar nuevu al traviés de les plataformes dixitales. Trátase de “Dios Salve al Rei” una versión del himnu punk de los Sex Pistols “God Save The Queen” anque con dedicatoria a la monarquía española. El single asoleyó’l 12 d’ochobre, Día de la Hispanidá, y como ironiza’l cabezaleru del grupu, Xelu Estébanez, «esi día tol mundu saluda al Rei mui afectuosamente, asina qu’Asturtralla tamién-y manda un saludu pa que lu disfrute».

La publicación d’esti cantar supón la continuación del proyectu musical d’Asturtralla, formación que tuvo n’activa n’Avilés a mediaos de los años 90 -grabaron un par de maquetes y participaron nel compilatoriu ‘Sáca-yos la Llingua‘ (1997, L’Aguañaz)-, y que l’añu pasáu volvió a l’actividá llanzando en CD y en plataformes dixitales el so primer trabayu discográficu.

Agora la intención de la banda ye siguir col so camín: «Sacaremos esti 2022 otru par de temes, llueu otros dos na primavera y la idea ye entamar a ensayar en xineru pa poder dar dalgún conciertu», comenta Estébanez sobre los próximos pasos del que foi ún de los grupos pioneros del rock n’asturianu y que cuasi tres décades dempués de formase, van volver a los ensayos.

Comprar discos de rock n’asturianu na tienda online