Un mes dempués d’asoleyar el videoclip de ‘Añada pa Rocío & Corralín’, Leirana publica’l so primer llanzamientu en toles plataformes musicales, Caciplando. Trátase d’un EP de trés temes agrupaos en dos pistes: la primera recueye la mentada añada xunto a la reinterpretación de la xota’l Corralín, y la segunda ye’l ‘Romance de la gentil dama y el rústico pastor’, una lletra tradicional que Nel Villanueva reellabora con un soníu mui orixinal.
«Nestos temes pue sentise una esbilla de lo que ye’l repertoriu del proyeutu Leirana«, desplica Villanueva sobre Caciplando. El músicu comenta que l’EP «va de los soníos más tradis col ‘Corralín’ a composiciones nueves como pue ser la ‘Añada pa Rocío’, que bebe muncho de lo tradicional pero a la vez ye una creación nueva». Amás, destaca «lo mas estremao, que ye’l romance, con una lletra per antigua pero una melodía tamién nueva con un soníu mui indie que s’alloña d’instrumentos mas orgánicos como son la flauta y el curdión y métese en guitarres eléctriques, baxos y batería«.
La escoyeta de les dos pieces tradicionales nun ye casualidá, el cabezaleru de Leirana escoyó’l ‘Corralín’ polo que significa pa él Degaña: «Ye muncho; ye ún de los sitios onde más llibre pudi sentime tocando y compartiendo folklore equí n’Asturies. Sobre manera recuerdo con muncho ciñu eses primeres vegaes qu’aquello non taba mui bravo tovía; conocer a Rosa, Vitorino y a María la tocadora. Que nos dieran un espaciu pa rellacionanos (la so casa) amás de compartir la su cultura, ye daqué que nunca vamos poder pagar».
D’otra banda el ‘Romance de la gentil dama y el rústico pastor’ escoyólo «a base de güeyar el romanceru medieval, porque paez que la melodía me pedía un romance». Nel Villanueva añade que «nun foi fácil topar una pieza que nun falara de ‘osties o muertes'» y topó esta que-y paeció «curiosa pola manera de describir too».
Cola publicación de Caciplando, Leirana fai una primer amuesa de la so propuesta: «El proyeutu en sí toi intentando orientalo de manera natural (lo que me presta), ensin buscar nada en concreto, namás lo que va saliendo tres el estudiu propiu de los instrumentos que toco y del repertoriu tradicional col que trabayo, sumáu a les composiciones nueves que van surdiendo, que yá van garrando protagonismu nos directos». Amás, Villanueva nun lo fai solo y destaca «la maxa que fai Luis Senén Fernández nel estudiu 15:40 y el bon facer de Satur Vega al curdión y de David Fernández a les flautes».
Con esti Caciplando publicáu en toles plataformes musicales, Leirana esparde’l so llabor y complementa les actuaciones que tien en directo. Les más inmediates van ser el próximu fin de selmana: el 12 de xunu nos Alcuentros de Músiques Asturianes de Xixón y el 14 de xunu nel Festival de la Fresa de Candamu.
Suscríbite a les nuestres novedaes
