Del 1 al 10 d’agostu de 2025 el Festival Intercélticu de Lorient va celebrar la so 54 edición, que nesta ocasión ta dedicada a Los primos americanos. L’eventu más prestixosu del mundu celta ta acabante d’anunciar la so programación completa, na que, como tolos años, hai presencia asturiana nos conciertos, espectáculos, desfiles, masterclasses y esposiciones. La Delegación Asturiana nel FIL encabezada por Iñaki Sánchez Santianes cunta cola collaboración de la Conseyería de Cultura, Política Llingüística y Deporte, la Viceconseyería de Turismu y la Dirección Xeneral d’Agricultura, Agroindustria y Desarrollu Rural.
Nesta edición, les agrupaciones tradicionales que van representar al país son la Banda de gaitas La Reina del Truébano y el Grupu de baille San Félix de Candás. La primera n’actuar va ser Marisa Valle Roso na Place des Pays Celtes el sábadu 2. Al otru día, la banda moza Guieldu va tocar nel mesmu espaciu. El llunes 4, Alienda y Eva Tejedor & Les Pandereteres van tar na Taverne celte pela nueche. El grupu de power folk actúa otres dos veces nos escenarios de Le Kleub y la Place des Pays Celtes el martes 5 y el miércoles 6. Pel so llau, Eva Tejedor & Les Panderetes faen doblete na tarde y la nueche del martes 5 na Place des Pays Celtes y nel Quai de la Bretagne.
El miércoles 6, Bada & Muñalén comparten Le Palais con Xabier Díaz Quartet nel conciertu Sur les routes des Celtes du Sud. Ellí mesmo, Rubén Bada va formar parte del espectáculu Celtic Odyssey #4 el xueves 7xunto a otros 13 pernomaos intérpretes de los países celtes. La Delegación Asturiana zárrenla Pablo Carrera, que va poner una masterclass, la esposición de semeyes sobre indumentaria el vistir y les cuatro persones que se clasifiquen pal Troféu MacCrimmon de gaita.
Suscríbite a les nuestres novedaes
