La banda lluanquina Llaceria Rock tuvo n’activo poco tiempu, ente los años 1999-2002, anque dellos de los sos integrantes tendríen depués una trayectoria importante na escena asturiana n’otres formaciones. Daríen el primer conciertu nel branu de 1999 nes fiestes de Santana, nel barriu altu de la capital gozoniega, depués vendríen una ventena más d’actuaciones.
Los integrantes orixinales foron: Miguel Fernandi ‘Burilo’ (voz), Rafa Ávila (guitarra), Pablo Rodríguez (baxu) y Wes Rodríguez (batería); que grabaríen una maqueta titulada Yá tamos equí, con seis temes, toos ellos n’asturianu sacante ún, que ta disponible en YouTube. Enantes d’ello llegaríen a esparder una grabación rexistrada en directo nel festival Desmalla Rock de Lluanco (1999) —col nome xenéricu de Caña al Gayo!!!—, qu’agora ponemos a disposición nel Archivu de la Música Contemporánea Asturiana (AMCA).
Nella podemos apreciar el soníu punk-rock que los caracterizaba y les lletres de calter socio-políticu fundamentalmente, con temes como ‘Hai delles coses’, ‘¿Asturianu? Sí, gracies’, ‘Fai tiempu que dexé de creyer’, ‘Borrachos y dinamiteros’ (versión del tamién grupu gozoniegu Karne Antisocial) o ‘Güel a macarrón’ (versión de Green Day). Bien d’años depués de la so desapaición, nel 2019, volveríen a xuntase pa dar un conciertu especial que valió pa remembrar aquella formación que resultó ser semiente d’otros proyectos posteriores.
El cantante y lletrista de Llaceria Rock, Miguel Fernandi, qu’enantes tuviere n’otra formación de nome Xorrez y depués fundaría Skama la Rede, fala d’aquella esperiencia y fai alcordanza de la mesma.
La verdá ye que yéremos más malos que la carne del pescuezu. Yéremos mui mozos, ente los 16 y los 20 años, cásique ensin esperiencia musical y con una capacidá lliteraria mui llimitada. Y esto último dígolo por min qu’escribía lletres como churros. «Independencia, oficialidá, estáu opresor y clas trabayadora«, con eso valía pa facer una docena de testos nuna tarde que nun se revisaben y que diben p’alantre.
Tampoco perdíemos muncho’l tiempu en facer les músiques. Eso sí, ensayar yera sagrao. Tolos sábados a primer hora de la tarde, un botellón encubiertu pa depués dir a la discoteca. Prioridaes de la vida adolescente. Como aquello que pa salir a tocar había qu’enfilase sí o sí.
Con Llaceria Rock pasémoslo mui bien, lleguemos a meter muncha xente na Discoteca Atlántida na presentación de la maqueta Yá tamos equí que nos grabara Miguel Herrero. Depués, había que defender los temes en directo y yá había problemes. Muestra d’ello ye esta grabación d’un conciertu que diemos nel Muelle del Gayo de Lluanco na celebración de Desmalla Rock, un festival qu’entamaba la Oficina d’Información Xuvenil y qu’axuntaba a grupos de la redolada.
Va unos años, volvimos a reuninos dalgunos de los componentes de Llaceria Rock pa dar un conciertu d’aniversariu. H.oder, tocar aquelles canciones yera volver a aquella mocedá que taba bien como mocedá. Unes versiones nel setlist p’adornar el conciertu y pasalo bien. Depués fiximos dalgún más por dalguna cuestión puntual pero’l grupu volvió a onde tien que tar: na alcordanza de quien quiera.
Foi una dómina mui prestosa que nos valió a dalgunos pa depués montar o tocar n’histories como Skama La Rede, Güerku, La Tarrancha, delles orquestes, grupos de versiones o tributos.
Suscríbite a les nuestres novedaes
