Tres de llanzar el pasáu payares en plataformes musicales el so segundu EP, La Llobera, Llevólu’l Sumiciu anuncien la edición d’esti trabayu en formatu vinilu. El sellu Samain Music va asoleyar l’álbum en vinilu 12″, de color amariellu con trazos prietos y una funda interior diseñada peles dos cares. La edición ta llendada a 300 copies y pue acutase yá por 20 euros na tienda online de la discográfica.
La Llobera ye’l segundu trabayu discográficu de Llevólu’l Sumiciu. El dúu d’electrónica de raigañu presenta cinco temes nos qu’hai composiciones propies, reellaboraciones de pieces tradicionales y unes influencies sonores que van dende l’asturianada y les vaqueires hasta’l dembow y los ritmos afrollatinos. Too ello col telón de fondu de la historia d’Ana María García ‘La Llobera’.
Nél rescampla una madurez del so soníu, una propuesta más rítmica y la inclusión per primer vez de composiciones orixinales dafechu nos cortes ‘Nacida de la bruma’. Esti tema tien dos partes -qu’abren y piesllen l’EP- y nél pon voz y lletra Neurora, cantante que yá collaborara con ellos nel tema ‘Ronzón’. Tamién suena sampleada la voz del cantador de tonada Juanín de Mieres (1905-2003) en ‘Mio madre como era probe’.
Otra de les novedaes ye que tamién ye un álbum conceptual. El puntu d’alcuentru ye la lleenda d’Ana María García ‘La Llobera’, llanisca xulgada doblemente nel sieglu XVII: pola inquisición y pola sociedá, que nun aceptaba qu’una muyer quixere ser llibre, tamién no tocante a l’amor. D’esta manera, Llevólu’l Sumiciu escoyeron temes de los yá teníen fechos que pudieren rellacionase con esta historia y les lletres de ‘Nacida de la bruma’ traten esta cuestión, incluyendo amás pasaxes del cómic Ana María. La llobera d’Asturies, obra cola que Guillermo Menéndez Quirós algamó’l Premiu Alfonso Iglesias de Cómic en 2022.
Suscríbite a les nuestres novedaes
