L’Asociación Cultural Llacín ye una de les entidaes más dinámiques del oriente del país y esti fin de selmana vuelven a amosalo con otra edición de Llaciniegu, la romería del Llacín. El conciertu presentación del discu Resollu de la Banda Gaites Llacín -vienres 4 a les 22h en La Vega La Portiella de Llanes- nel que tamién actúen Felpeyu y Baxel ye l’arranque d’esti eventu. D’esta manera Porrúa va enllenase’l sábadu 5 d’arte, música y baille tradicional gracies a la participación en delles actividaes la mentada BG Llacín y la so bandina, Grupu Etnográficu L’Oriente, Outru Andare y Algaire.
A les doce la mañana entama esta romería cola inauguración de la esposición Porrúa en Bolas y la presentación d’Una Bola con Hestoria xunto a Puru Remangu. Tres de la entrega del bollu y una xinta nel prau la Bandina Llacín va actuar a les 19h, xusto enantes d’un taller de baille tradicional a les 19.30h col GE L’Oriente. Pa les 20.30h actúa la Banda Gaites Llacín, a les 20h hai Danza Prima – Al Son del Corru y a les 21.45h entama una Nueche en Danza. Esta va tar dinamizada pol GE L’Oriente -21.45h-; pol dúu Outru Andare, formáu por Alba Menéndez (6 Riales) y Sabu (D’Urria); y por Algaire, que van tocar a la medianueche enantes d’una actuación con DJ. Toles actividaes son de baldre.
Suscríbite a les nuestres novedaes
