Los hermanos Hevia lleven la historia gaitera asturiana a Villaviciosa

El sábadu 1 d’ochobre, a partir de les 19:30 hores, nel Teatru Riera de Villaviciosa, con entrada llibre hasta completar l’aforu -les invitaciones pueden consiguise dende unos hores enantes na mesma taquilla-, María José y José Ángel Hevia van ufiertar una actividá titulada La Conferencia. Dende l’área de Cultura del conceyu maliayu espliquen que se trata d’«un viaxe pela Asturies del sieglu XX nel que, valiéndose de les nueves tecnoloxíes, consiguen el soníu d’aquelles llexendaries agrupaciones de gaites que nun podíen faltar nes romeríes como Los Quirotelvos, Los Ribanavias, Los Carbayones y Son d’Arriba».

Esta conferencia musical afonda nos comienzos artísticos de los Hevia, con un repertoriu -acompañáu de proyecciones- que xenera una atmósfera que tresporta al espectador per paisaxes y fiestes d’Asturies. Una esperiencia calificada de «máxica» dende la Conceyalía de Cultura. Nella, el públicu va poder ver a José Ángel tocando la gaita, la flauta, l’acordión diatónicu y el loop station (un grabador de frases musicales curties que permite dir sumando capes una enriba d’otra); mientres que María José va interpretar delles pieces col tambor asturianu y otres percusiones tradicionales como distintos tipos de panderu.

Los hermanos Hevia, heriedes de la tradición oral de los gaiteros y tamboriteros asturianos antiguos, tán presentando esti proyectu en formatu reducíu, al marxe de los grandes circuitos comerciales nos que desenvuelven davezu la so carrera artística.

Discos de gaita a la venta na tienda