Mostru l’Horru llanza’l so primer discu ‘Señales de Fumu’

Yá ta a la venta na tienda online y en toles plataformes dixitales Señales de Fumu, el primer trabayu discográficu del grupu de rap n’asturianu Mostru l’Horru. Ocho cantares dan forma a esti álbum hiphop nel que tamién suenen influyencies d’otros estilos como’l reggae o’l rock. Too ello con unes lletres enllenes de crítica social, como yá adelantaron nos singles “Intierru”, “Fame” -del qu’asoleyaron un videoclip-, y “Fíu d’un pueblu”, tema nomináu al Premiu Camaretá al Meyor Cantar 2022.

«El nome tien yá cuatro o cinco años. Nació en Tanda (Ponga) un día que taba faciendo’l babayu embaxo l’horru. Foi frutu de les rises ente collacies y de que toi como una cesta figos. Entós, cuando fai poco más de dos años entamé a escribir les canciones n’asturianu, el nome ya taba ehí, naguando», comenta Francisco Méndez, cabezaleru d’esti proyectu musical, sobre los oríxenes de Mostru l’Horru. El cantante animóse a facer rap pa «espardir la llingua asturiana ente’l públicu más mozu» y tamién por pragmatismu: «alcontréme más cómodu rapeando, atopé más facilidá pa falar de coses profundes y dime cuenta que taba faciendo dalgo muncho más orixinal», comenta’l raperu. 

Dempués d’un procesu de más d’un añu escribiendo temes y llueude grabar una demo con 20 instrumentales d’Internet, n’ochobre del añu pasáu entró nel estudiu del productor llangreanu Zeros. «Sobre la marcha fuimos escoyendo y faciendo premezcles y nestos últimos tres meses dimos-y un repasu a too pa retocar los temes ellí onde foi necesario», desplica Méndez sobre esti procesu que dio como resultáu l’álbum Señales de Fumu.

Rap n’asturianu

«El discu ye orgánicu con dalgunos toques dixitales; les rítmiques son bastante agresives… anque hai escepción. Puedes topar temes onde manden les guitarres y que van dende’l rock hasta’l country. N’otros manda’l pianu y les coses tórnense un poco más tristes. Hailos más crudos y más baillongos». comenta’l raperu sobre esti discu diversu y con unes lletres nes qu’«hai muncha alcordanza personal y política». «Falo de los mis güelos, d’Asturies y de la triste realidá que tamos viviendo. Rapeo dende la rabia y la impotencia, pero también dende l’esperanza», esclaria Francisco Méndez.

La personalidá presente en Señales de Fumu arriquezse más tovía gracies a les collaboraciones que suenen nel CD. «Pa mí Guaja D y Arma X son los mayores referentes del rap n’Asturies», opina Méndez y por eso faló con ellos pa que pongan les sos rimes n’asturianu a dos de los temes, mientres que Nel de Purnea tamién da-y cola so guitarra un «toque folkie» a otru cantar. Con toes estes blimes, Mostru l’Horru presenta esti primer discu qu’amás supón que la llingua asturiana vuelva a sonar nun LP de rap, dalgo que nun pasaba dende la publicación del Conciencia Llibre de K-Nalón en 2005. D’esi añu pa equí, namás hubo rap n’asturianu en cantares puntuales incluyíos en compilatorios o nos temes publicaos por Soncai System o Músicos Pola Oficialidá, pero nunca dientro d’un proyectu musical estable.

«Ye un reflexu de la diglosia. Paez que pa dalgunos estilos l’asturianu nun ye una llingua afayadiza; ye como si perdieran seriedá… ¿si cantes reggaetón n’asturianu hai que salir nel videoclip perreando en madreñes? Nun tien porqué. Pero muncha xente muévese neses caricatures. Nun ye xusto», opina’l cabezaleru de Mostru l’Horru sobre la poca presencia de la llingua asturiana en xéneros musicales urbanos. Tamién añade qu’hai quien nun rapea n’asturianu «por complexu, porque nun lo falen bien del too». Sicasí, con proyectos como’l suyu y discos como esti Señales de Fumu la música n’asturianu espoxiga y sigue abriendo camín.

Mercar discos hip hop y electrónica na tienda online