Prepárase un ochobre enllén de música asturiana

La temporada braniega que ta acabante de llegar al so fin foi la del realcuentru del públicu asturianu cola música del país; ello ye que volvieron a entamase munchos eventos que la tuvieron como protagonista, dellos con años de trayectoria que se retomaben agora pero otros de nueva creación. Ente toos ellos iguaron un calendariu estival nel que miles de persones disfrutaron y s’interrellacionaron colos sones llariegos. Nesti sen, destacaron festivales de varios díes como los intercélticos d’Avilés y Occidente, el Sol Celta (Avilés) o l’Internacional de la Gaita de Villaviciosa; amás de los d’una sola xornada como Porcía, Carrio o Soto Rei. A too ello hai qu’añader los abondosos alcuentros de bandes de gaites o les xornaes dedicaes a Elías García (Villaviciosa) o al vigulín (Piloña).

Si hubiere que rescamplar dalgún d’estos eventos hai tres que lo ameriten; el primeru sería’l conciertu dedicáu al rock astur nel festival Kuivi PopUp d’Uviéu, coles bandes Skama la Rede, Ochobre y Dixebra, que se convirtió nel más multitudinariu de tolos de la so programación y que vivió un ambiente impresionante; otru sería la recuperación de la histórica Nueche Celta de Soto (Ayer) qu’axuntaba a les tres formaciones que tuvieren presentes na so primer edición nel añu 1996: Felpeyu, Llan de Cubel y Dixebra; por últimu’l conciertu de Los Berrones nes fiestes de Xixón, col que celebraben el so trenta y cinco aniversariu y qu’axuntó en Poniente a dellos miles de persones.

Y si’l branu foi escepcional pa la música asturiana, la seronda escomienza con un ochobre enllén d’actividaes que tienen a los nuestros sones nel centru de la so programación. Yá dende’l primer día (sábadu 1) empiecen les cites, ye’l casu de Candamu al Son (Grullos), cola cantadora Liliana Castañón y el grupu folk Tras el Muro, amás de delles bandes de gaites. Esi mesmu día Mª José y José Ángel Hevia ufierten en Villaviciosa l’actividá titulada La Conferencia, sobre la historia de la música asturiana. Los díes 7, 8 y 9 va desenvolvese en Mieres el IX Ochobre Folk con charres, pasacáis, Nueche en Danza, alcuentros folclóricos, tonada o conciertos. El domingu 9, dientro de la programación del Ochobre Fest en Llangréu, va dedicase la xornada a la música del país coles pandereteres 6 Riales, el grupu de baille Reija y el tríu folk formáu por Dani Álvarez (flauta), Lisardo Prieto (vigulín) y Luis Nicolás (guitarra). El vienres 14 el llugar de Santolaya (Cabranes) va entamar la so primer Nueche Celta con dos formaciones que resumen cuatro décades de reellaboración de la nuestra música, la novel Algaire y la veterana Llan de Cubel. El Colectivu de Baille y Música Tradicional L’Enguedeyu de Llangréu entama’l sábadu 15 la XII Seronda, cola actuación nel Nuevu Teatru de La Felguera d’Eva Tejedor & Les Pandereteres y la entrega del Enguedeyu de Bronce a l’Asociación pola recuperación de los Sidros y les Comedies ‘El Cencerru’ de Valdesoto. Nel penúltimu fin de selmana (21 y 22) va desenvolvese n’Avilés la XIX Seronda entamada pola Federación d’Asociaciones Xuntanza Avilés, de la que van dar a conocer el so programa completu nos próximos díes, pero que como ye vezu va contar con cantidá d’actividaes nes que nun va faltar la música. Amás d’estos eventos hai que sumar tamién los conciertos individuales o colectivos de bandes como La Tarrancha nel local Cuévano (La Pola Siero) el martes 11, La Bonturné nel Tendayu del Pueblu d’Asturies en Xixón el sábadu 15 o’l que van ufiertar los grupos Parva Cuchu, Sangre d’Ochobre y Skama la Rede na sala Gong (Uviéu) el sábadu 29.

Discos de música tradicional y folk a la venta na tienda