Mapi Quintana reedita ‘Severina’, el discu con Elías García

Dempués de más d’un añu descatalogáu, el CD de Severina vuelve a tar disponible. Coincidiendo cola so campaña de crowdfunding y los dos discos que quier asoleyar próximamente –Música pa tornar páxaros y La Maramoniz-, Mapi Quintana reedita esta obra que grabó en 2014 xunto al difuntu Elías García. Nesti discu de cultu, la contrabaxista y cantante y el bouzuquista dan forma a 9 cantares del conceyu L.lena reellaboraos con maestría y orixinalidá.

«Dempués de deprender los cantares tradicionales de L.lena, Mapi Quintana y Elías García entamen a trabayar na búsqueda d’un nuevu contestu estéticu pa estes melodíes tradicionales. A traviés de progresiones armóniques heredaes del jazz y de la música europea del sieglu XX, la improvisación y un enfoque vocal fresco del indie-jazz, crean un soníu nuevu pa la música tradicional asturiana». Esa yera la carta de presentación d’esti discu asoleyáu va 9 años y del qu’agora vuelven tar a la venta 50 unidaes.

La reedición d’esta obra enmárcase dientro de los nuevos proyectos de Mapi Quintana. L’artista l.leniza quier publicar esta primavera los discos de Música pa tornar páxaros -formáu pol repertoriu compuestu pal espectáculu que-y encargó’l gobiernu asturianu pa representar a Asturies na 51 edición del Festival Intercélticu de Lorient- y de La Maramoniz, el proyectu musical nuevu que tien xunto César Latorre, Juanjo Díaz y Sonia Cartón y col que yá llanzó l’adelantu Agarráu de La Maramoniz“. El coste de grabación, fabricación y promoción d’estos dos álbumes perpasa los 13.000 euros y por ello Quintana llanza una campaña de crowdfunding en Verkami nel que pide un mínimu de 8.000 euros pa poder afrontar tolos gastos del proyectu.

Más de 25 años de trayectoria

Nacida nel conceyu L.lena y con estudios universitarios musicales cursaos nel Conservatoriu d’Ámsterdam, lleva más de 25 años formando parte de proyectos rellacionaos col jazz, cola música tradicional asturiana y cola improvisación. En 2009 asoleyó’l so primer discu en solitariu, El Sonar de les Semeyes, que supunxo toa una novedá dientro del jazz y la música de raigañu. Amás d’ésti, tien otros ocho trabayos publicaos tanto participando xunto a formaciones como Blima, Aire o Eladio Díaz Folk Ensemble, como a dúu col yá fináu músicu folk Elías García (Severina); y a tríu con Michael Lee Wolfe y Jacobo de Miguel (Xota pa Tres). Con estos dos álbumes nuevos, Mapi Quintana da un pasu firme nel so camín.

Dexa un comentariu

X