Mapi Quintana llanza un crowdfunding pa financiar dos discos
Dempués de 9 años ensin sacar un discu, Mapi Quintana nun vuelve con un trabayu, sinón con dos. L’artista l.leniza quier publicar esta primavera los discos de Música pa tornar páxaros -formáu pol repertoriu compuestu pal espectáculu que-y encargó’l gobiernu asturianu pa representar a Asturies na 51 edición del Festival Intercélticu de Lorient- y de La Maramoniz, el proyectu musical nuevu que tien xunto César Latorre, Juanjo Díaz y Sonia Cartón y col que la selmana pasada llanzó l’adelantu “Agarráu de La Maramoniz“. El coste de grabación, fabricación y promoción d’estos dos álbumes perpasa los 13.000 euros y por ello Quintana llanza una campaña de crowdfunding en Verkami nel que pide un mínimu de 8.000 euros pa poder afrontar tolos gastos del proyectu.
Amás de la calidá de la música, estos dos trabayos destaquen porque entren pelos güeyos. Si’l crowdfunding finaliza con éxitu, Música pa tornar páxaros va asoleyar nun formatu únicu y orixinal. El CD va dir dientro d’una caxa de cartón artesanal, que tien dellos elementos decorativos y qu’inclúi una postal por cada cantar, fecha con munchu procuru pola diseñadora gráfica d’esti proyectu, l’artista catalana Marina Durany. Ye una pieza de coleccionista qu’engalana tol conceptu d’esta obra tan destacada. Per otru llau, La Maramoniz va asoleyar tamién nun formatu cartón ensin usu de plásticu -por aquello de la sostenibilidá-, con un llibretu en formatu póster. L’autora de tola gráfica d’esti otru discu ye Leticia Baselgas, ilustradora y diseñadora amás de cantante y panderetera en L-R y Calea.
Nesti crowdfunding Mapi Quintana quixo arrodiase de muyeres qu’emprenden n’Asturies por eso ente les recompenses hai artículos de les marques Ringo Rango, Puru Remangu y Mondo Manzana. Tamién los páxaros -y l’alcordanza a Elías García– tienen un papel cimeru en tola campaña y tán presentes na camiseta unisex orgánica, la llámina artesanal esclusiva fecha por Marina Durany, y el llibru qu’ufre en collaboración con La Llocura de Mieres. Tamién hai recompenses centraes na trayectoria de Mapi Quintana qu’inclúi tola so discografía y destaca una charra pa cuatro persones nes que l’artista l.leniza va desplicar a lo llargo de 2 hores y media tol procesu de creación de Música pa tornar páxaros. A la fin, son 20 recompenses distintes que tienen un preciu dende los 4 euros hasta los 1.200 euros.
La música
«Música pa tornar páxaros ta dedicada al mio compañeru musical fallecíu en 2019, Elías García y a tola xente que nos dexó nestos últimos años, y musicalmente ta influyía pol jazz, la improvisación, la música impresionista y la música tradicional asturiana», comenta Mapi Quintana nel crowdfunding pa presentar esta obra -de la que remite tamién a esta entrevista y crónica en musicasturiana.com-. Per otru llau, de La Maramoniz desplica lo siguiente: «La materia prima d’estos temes son los cantares que-y sentí a mio güela y qu’ella deprendió n’aldea de La Maramoniz. Tamién hai cantares de composición propia y nellos entemezo la influencia de la tradición asturiana nes melodíes y nes temátiques xunto a estétiques más vanguardistes nos arreglos».
A la fin, un proyectu mui ambiciosu y orixinal el que trai esta artista que ye ún de los nomes más destacaos de la escena jazz y folk asturiana. Nacida nel conceyu L.lena y con estudios universitarios musicales cursaos nel Conservatoriu d’Ámsterdam, lleva 25 años formando parte de proyectos rellacionaos col jazz, cola música tradicional asturiana y cola improvisación. En 2009 asoleyó’l so primer discu en solitariu, El Sonar de les Semeyes, que supunxo toa una novedá dientro del jazz y la música de raigañu. Amás d’ésti, tien otros ocho trabayos publicaos tanto participando xunto a formaciones como Blima, Aire o Eladio Díaz Folk Ensemble, como a dúu col yá fináu músicu folk Elías García (Severina); y a tríu con Michael Lee Wolfe y Jacobo de Miguel (Xota pa Tres). Con estos dos álbumes nuevos, Mapi Quintana da un pasu firme nel so camín.
