Les sales de conciertos de la capital del país acueyen esti vienres 27 de marzu dos presentaciones en directo de novedaes discográfiques. L’artista llangreana Marisa Valle Roso va tocar a les 21h, na sala Tribeca Live y con un preciu d’entrada de 18 euros, pa poner enriba l’escenariu los temes del so discu nuevu, Cenicientes. D’otra banda, el proyectu de música tradicional asturiana y electrónica, Tasio, va dar el so primer conciertu nel qu’estrena’l so discu Clá 83. La cita ye nos Kuivi Almacenes a les 21h y tien entrada llibre.
Cenicientes ye’l trabayu más completu de Marisa Valle Roso. Ta formáu por diez cantares qu’entemecen el folk col pop y los instrumentos electrónicos y nel que-y canta al feminismu, a la llucha pola xusticia social, a la reivindicación de la memoria colectiva asturiana y de la so identidá. Tamién afonda no más personal, dedicando’l so espaciu a la salú mental, el gran problema de la sociedá del sieglu XXI. El conciertu d’Uviéu enmárcase dientro de la xira d’esti discu que ta llevando a la cantautora per ciudaes de tol Estáu español.
Clá 83 ye’l primer trabayu discográficu de Tasio. Esti artista venceyáu a la música asturiana y a la electrónica dende hai 20 años axunta estes dos corrientes musicales nel so proyectu en solitariu que presentó l’añu pasáu. Nos once temes que formen el so debut suena «dubstep, drum&bass, rap, spoken word… too pasao pol filtru de lo tradi y con un toque bastante pop, sobre manera na forma de cantar», como destaca Dudu García, alter ego de Tasio.
Suscríbite a les nuestres novedaes
