La música asturiana protagoniza más d’una ventena d’eventos hasta’l fin d’avientu

Doce conceyos del país acueyen eventos estremaos nos que va sonar folk, música tradicional, electrónica, rock, pop y zarzuela.

Eventos

Dende güei hasta’l fin d’avientu hai diez conciertos programaos y otros once eventos qu’axunten xéneros y estilos estremaos nos conceyos de Cabranes, Llanera, Uviéu, Llangréu, Llanes, Carreño, Villaviciosa, Castrillón, Xixón, Grau, Tinéu y Avilés. Les cites entamen güei a les 18h cola presentación del llibru d’Héctor Braga Nel cantu la memoria en Cabranes, onde tamién presenta, a les 20h, Dolfo Camilo Díaz el so musical Flashback. De siguío, Vero Rubio toca en Posada Llanera a les 19h, al mesmu tiempu que Leticia Baselgas presenta los sos Diarios d’una panderetera en Matadero Uno (Uviéu). El conciertu de La Bonturné en La Felguera a les 20h y el de Ferla Megía a la mesma hora nel Casinu de Llanes completen la tarde del vienres.

El fin de selmana sigue con conciertos y espectáculos pal sábadu 14: Volviendo a L’aniciu del GBT San Félix de Candás a les 18h na Antigua Fábrica d’Ortiz, el Festival de Navidá de la Escuela de Música Tradicional de la Banda Gaites Villaviciosa a les 19.30h nel Teatru Riera y Llevólu’l Sumiciu nel Casinu de Llanes a les 20h. Na selmana viniente, Héctor Braga vuelve a presentar el so llibru nel Atenéu Obreru de Villaviciosa, el vienres 20, y Jose Manuel Tejedor Trío xúbense al escenariu del Valey Centru Cultural de Piedras Blancas. Al otru día, sábadu 21, conflúin delles cites bien estremaes. Per un llau, el LABShop acueye un taller de baille tradicuir de Les Pites a les 12h y, amás, l’estrenu del espectáculu poéticu-musical Ser quien a cantar a les 17.30h. Per otru, Luis Pola imparte de la mano de La Flor de Grau, un taller d’averamientu a la gaita asturiana de baldre ente les 18h y les 20h. Nel intre, 6 Riales actúen pente Dinamizartj nel Cine Marvi de Tinéu a les 19h. Per último, el Centru Niemeyer acueye l’estrenu de la zarzuela Carretera de Avilés a les 20.30h.

Les feches navidiegues inaugúranse con música asturiana gracies a la sesión vermú qu’entamen Soi Panderetera na plaza de La Corrada de Cimavilla a les 13h del martes 24. Pa finar la temporada de conciertos d’esti añu, hai tres cites el sábadu 28 d’avientu: Dixebra na Sala Tribeca d’Uviéu a les 19.30h, la Nueche en Danza Navidiega de Villaviciosa y el doble conciertu de los artistes mozos Ferla Megía y Llevólu’l Sumiciu en La Salvaje (Uviéu) a les 21h.