Del 8 al 10 d’abril vuelve Música en Rede. Alcuentru profesional, les xornaes profesionales entamaes pola Conseyería de Cultura, Política Llingüística y Deporte -a traviés de Cultura en Rede- nes qu’hai meses de debate (Conxustes), presentaciones (Rolda), talleres formativos (Erbíes), showcases (Llabor) y puntos d’asesoramientu (en rede) pa que «artistes, profesionales y públicu tengan oportunidá d’interactuar y texer redes, amás de ser un escaparate pa visibilizar, dinamizar y profesionalizar la música emerxente fecha n’Asturies».
Pa esta segunda edición ta acabante d’abrise’l plazu de recepción de propuestes musicales pa facer un showcase dientro de Llabor. La fecha tope pa presentar candidatures ye’l miércoles 5 de febreru a les doce’l mediudía y pue facese a traviés del rexistru electrónicu de Cultura en Rede. Hai previstes doce actuaciones -seis de formatu pequeñu nel Paraninfu de la Llaboral y otres seis de formatu medianu o grande nel Teatru de la Llaboral- con una duración d’ente 30 y 40 minutos. Les amueses van tar remuneraes con una cifra d’ente 500 € y 2.000 € -más otros 250 € por técnicu- y van tar dotaes de la infraestructura técnica necesaria.
Los detalles de la convocatoria tán disponibles na web d’Asturies Cultura en Rede, onde tán disponible les bases cola información al completu. Nelles detállense toles condiciones económiques y técniques y dase la información sobre’l procesu de valoración de les propuestes recibíes, nel que destaca que nun van repetise proyectos que yá actuaren na edición anterior y que van priorizase los que tengan un llanzamientu nuevu y/o compuestu en 2023 o 2024, que compongan temes de creación propia y usen l’asturianu o gallego-asturianu nes lletres.
Suscríbite a les nuestres novedaes
