Del 28 al 31 d’ochobre celébrase en Bilbao el BIME PRO 2025, ún de los eventos más destacaos de la industria musical que se fai nel Estáu español -n’ediciones anteriores participaron más de 3.000 profesionales de 45 países, 1.450 empreses, 250 ponentes y hubo 105 conferencies-. Musicasturiana.com va participar per cuartu añu consecutivu nel eventu pa medrar en conocimientos rellacionaos cola industria musical gracies a les distintes charres, conferencies y talleres; pa visibilizar la música del país y crear oportunidaes de negociu con otros axentes culturales; y pa conocer les polítiques musicales que tán desendolcando distintes alministraciones públiques.
El BIME PRO ye un alcuentru internacional de la Industria Musical que se fai dende 2013 en Bilbao y, dende 2022, tamién en Botogá (Colombia). Ye ún de los alcuentros musicales más importantes de la industria musical del Estáu español, con miles d’asistentes de tol mundu y nel qu’hai ponencies, formación, conciertos, esposiciones profesionales, alcuerdos de negociu, etc.
L’Agencia Andaluza de Instituciones Culturales; Sounds From Spain, Basque Music -marca pa la internacionalización de la música vasca-; Navarra Music Commission -marca pública pa la dinamización de la música na comunidá foral de Navarra-; y Valencian Music Office -plataforma de visibilización, difusión y dinamización de la industria musical valenciana-, Aragón Exterior, l‘Institud d’Estudis Balears son dalgunes de les entidaes públiques dependientes de les sos respectives conseyeríes de Cultura que van tar presentes nel eventu y coles que Musicasturiana.com quier caltener contactos pa deprender d’unos exemplos d’estes polítiques musicales. Amás, va haber representación d’otres entidaes asemeyaes provenientes de países como Alemaña, Chile, Arxentina o los Países Baxos que van citase hasta’l 31 d’ochobre nel Palacio Euskalduna de Bilbao.
Pa poder participar nel BIME PRO 2025 la empresa qu’alministra Musicasturiana.com va recibir una subvención de la Conseyería de Cultura, Política Llingüística y Deporte dientro de les ayudes a profesionales y empreses pa la formación y profesionalización del sector cultural asturianu.
Suscríbite a les nuestres novedaes
