Yera un vienres normal na Costera (asina se llama a los pueblos de la zona de Pando na parroquia de Rañeces). Sicasí, entá tenía resaca’l prau de la fiesta de Pando de la última fin de selmana coles fiestes de Santa Marina. Pero nin mieu, ni piedá cuando se trata de baillar, esi ye ún de los munchos mantres que tuvimos los qu’esfrutamos abondo de la Romería en Pando. Enantes de cuntar lo que foi una nueche de maxa y bruxería, paga la pena cuntar cómo entamó esta nueche nel conceyu moscón.
Va años, cuando yera universitaria, conocí la pallabra autoxestión. Venía propuesta al traviés de partíos políticos y dalguna organización, pero eso yo yá lo conocía, porque soi una nena criada ente los pueblos de mios güelos paternos y maternos, ente Samartín de Lluiña y Sorribas. Mesmo nun llau, mesmo n’otru, dexáronme mui claro que les coses o les facíemos dende la unión o naide diba facelas por nós. Sestaferies, partos de vaques, matances o dir a pañar pataques. Too eso viví y con ello deprendí qu’hai requexos onde namás furrula la nuesa unión.
«De neña dexáronme mui claro que les coses o les facíemos dende la unión o naide diba facelas por nós. Sestaferies, partos de vaques, matances o dir a pañar pataques. Too eso viví y con ello deprendí qu’hai requexos onde namás furrula l’autoxestión»
Por eso, cuando nos llegó un was al grupu de pandereta falándonos d’entamar a facer una Romería, naide duldó en facer la so aportación personal, pudiera o non dir a Pando, puxando pa qu’aquello tirara p’alantre. Cónstame que los organizadores ablucaron pola acoyida. Dalgo qu’entamó a facese p’axuntanos en branu y dar vida al pueblu de Pando, acabó por ser un festi onde s’allegaron más qu’amigos y conocíos, anque pa decir verdá esa nueche toos yéremos de casa ensin conocenos.
La primer puntada del eventu vino al cargu d’Alicia Cañedo y el so taller de lligues. Mientres les participantes deprendíen atentes, el restu d’asistentes diben aportando adulces. Llama l’atención que naide vino coles manes vacíes: empanaes, tortielles, tartes, pasteles… Respirábase unión y ganes de pasalo bien. Al poco, entamamos con Nel toles alumnes de los talleres de Grau, Salas, Miranda y Candamu. Dalgunes llevábemos selmanes ensin tocar, pero la memoria muscular enxamás defrauda y llogramos un repertoriu mui guapu. Dempués llegaron las nenas de Cangas del Narcea.
¿Qué voi dicir d’Otramiente? Xovencísimes, fueron armando toles pieces pal baille, con un repertoriu mui variáu, cantares d’Ibias, Miranda, Cangas y por supuestu’l mio queríu Corralín. Prestaba veles enriba l’escenariu. Un escenariu onde nun faltaba un detalle, too decorao con ciñu y coses feches artesanalmente o como se diz agora “handmade”.
Tres d’elles llegaron Pau Santirso y María Trubia que fueron marcando’l ritmu mientres se nos diba la tardiquina y aportaba la nueche. D’ellos poco pueo decir del repertoriu porque como yera d’esperar nun perdí una pieza. Cola nueche tolos gatos son pardos y nos tornamos roxos de tanto baillar cola bandina Los Llerones. Asoleyáronnos el momentu tradi que se ta perdiendo en tantes romeríes, esfrutamos enforma del xuegu de les sielles o’l baille de la escoba.
Y asina, ensin aparar de baillar y cantar, llegó, a la fin, LA PITANZA. Dos meses enllenes de manxares fechos por tolos convidaos, mentanto dábemos cuenta d’ellos, Milio diba preparando la queimada. Dende la guapura que dan les nueches de branu, acolumbróse salir a seis almes penitentes d’un tendeyón. Diben vistíos con mandiles y nes manes llevaben instrumentos. Punxéronse enriba l’escenariu y presentáronse como: La bandina Los Mandiles.
Diego, Marta, Raquel, Mateo, Aida y Nel; con ellos y elles foi acabando una Romería como facía tiempu nun se recordaba na contorna. Col repertoriu tradicional y toles ganes de poner a la xente a baillar, la bandina foi tocando temes como ‘La Veleta’, ‘Xuanín de Mieres’ o ‘Chalaneru’ acompañaos poles voces de Loreto Suárez o Marta Sierra. Dempués fíxose un micru abiertu con munches panderetes y baille, pero como toa bona romería, acabó col ‘Asturies Patria Querida’ con Diego Lobo a la gaita.
Puxa l’autoxestión y les ganes de facer comuña pa pasar un bon ratu cantando y baillando. Nestos tiempos lo fácil ye mercar entraes pa macrofestivales y escaecese de lo demás. Diz muncho de la xente mozo que ta detrás de too esto, apostar por facelo como enantes anque munchos piensen qu’enantes foi nunca. Agora ye’l momentu de tornar pa nun escaecer. Llarga vida a estos proyectos y este idees que nos fixeron a toos ser felices y esfrutar. GRACIES.
Enantes de despidime tengo bones noticies en pallabres d’un de los sos organizadores, Diego Pando, «L’añu que vien faise abiertu a tol públicu, asina qu’acutái la fecha«.
Suscríbite a les nuestres novedaes
