Rodrigo Cuevas va actuar próximu 12 d’avientu nel Muséu del Louvre de París. L’artista asturianu va presentar «Al pie del llar», un conciertu íntimu que va formar parte del programa especial Grand Week-end Espagne, una programación dedicada a la cultura española nel conocíu muséu francés. La actuación va celebrase a les 21:00 hores nel Auditoriu Michel Laclotte y va tener una duración aproximada d’hora y media. El conciertu llega como parte d’un fin de selmana nel que’l Louvre va acoyer diferentes propuestes musicales, escéniques y culturales venceyaes con España.
El propiu muséu presenta a Rodrigo Cuevas como una de les figures más singulares del panorama musical español contemporaneu. Cantante, performer y agitador folclóricu, Cuevas construyó a lo llargo de los últimos años un universu propiu nel que la tradición asturiana ocupa un papel fundamental, xunto al humor, la llibertá creativa, el cabaré y la performance. Al pie del llar plantega una velada íntima y envolvente na que l’artista va llevar hasta París una mirada personal sobre la tradición y la cultura popular del norte de la península.
La actuación de Rodrigo Cuevas forma parte del programa España nel Louvre, que se va desenvolver ente los meses de setiembre de 2026 y xunu de 2027 y que va incluyir conciertos, cine, espectáculos, alcuentros y otres actividaes culturales. El programa ta venceyáu, amás, a les esposiciones que’l muséu dedica a Zurbarán y a la escultura policromada. D’esta manera, Rodrigo Cuevas vuelve a llevar la cultura asturiana más allá de les nueses fronteres, nesta ocasión hasta unu de los espacios culturales más reconocíos del mundu, con una propuesta que fai de la tradición un espaciu abiertu a la creación contemporánea.
Les entraes pal conciertu, que cuenta col sofitu d’Acción Cultural Española, yá tán disponibles al traviés de la programación del Muséu del Louvre.
Suscríbite a les nuestres novedaes
