Esti xueves 23 a les 19h la Biblioteca Pública Xovellanos de Xixón acueye una actividá nueva del ciclu Háblame de música. Nesta ocasión va participar el multiinstrumentista Rubén Bada cola charra Del folk al post-folk: de la tradición al sieglu XXI. El músicu adelanta que va facer «una charra-conciertu» usando la so trayectoria como «filu conductor» y buscando tamién «aldericar col públicu» pa facer un alcuentru «en dos direcciones».
«Nesta charra entamo dende esi folk que facíemos nos noventa y primeros de los 2000 hasta llegar a lo que toi faciendo agora; dende L-R hasta esti rollu que respeta les formes más tradicionales de la música asturiana, independientemente de los arreglos», desplica Bada. Pa ello va «llevar los instrumentos y los cacharrinos de L-R» pa desplicar cuál ye la so «filosofía» a la hora de facer música.
Rubén Bada ye ún de los músicos de folk asturianos con mayor proyección internacional. Vigulineru, guitarrista y conocíu sobre manera por tocar el bouzouki, collaboró con grupos como Corquiéu, N’Arba, Dixebra… Foi miembru de DRD, Xéliba, L-R, y ta acabante d’asoleyar el so primer discu en solitario, amás de continuar col grupu Calea, y collaborar con una montonera grupos y agrupaciones na escena asturiana, ente los que se cunta Rodrigo Cuevas.
Suscríbite a les nuestres novedaes
