En setiembre va haber tres festivales mui destacaos de música asturiana

Anque tea acabando agostu tovía queda más branu y el mes qu’entra va aportar con tres cites mui destacaes y gratuites pa tola xente aficionao a la música’l país: el XVI Festival Internacional de la Gaita de Villaviciosa del 31 d’agostu al 3 de setiembre; les III Xornaes del Vigulín Tradicional en L’Infiestu del 15 al 17 setiembre; y la primer edición del Cachufest en Trabáu (Degaña) del 22 al 24 setiembre.

El FIG (Festival Internacional de la Gaita) vuelve otru más con una estensa programación que va axuntar a lo llargo de cuatro díes esposiciones, pasacais, actuaciones de bandes y bandines, conciertos folk, mercáu, talleres, baille tradicional y canción asturiana. Ente la so bayurosa programación destaquen los conciertos de Llau -tríu formáu por Dani Álvarez, Lisardo Prieto y Luis Nicolás-, Alienda, Llan de Cubel, Deira & Borja Baragaño y los escoceses Project Smok. Tamién actúen les bandines La Xarangana, La Bandina’l Fuelle, La Bandina’l Busgosu, La Bandina d’Oscarín y la de la BG de Villaviciosa; y les bandes de gaites Folclore de Zamora, Ortigueira, Cuncordia A Launeddas (Cerdeña), Castro Bergidum (El Bierzo) y Villaviciosa-El Gaitero, organizadora del evento, Na estaya de canción asturiana participen Celestino Rozada, Águeda Riera, Manuel Roza, Néstor Díaz y el gaiteru Valentín Fuente.

Per tercer añu consecutivu L’Infiestu acueye les Xornaes del Vigulín Tradicional los díes 15, 16 y 17 de setiembre. Nelles va haber conferencies, sesión vigulinera, cursos, deporte tradicional, taller de baille y vermú en danza. Esti añu la xornada homenaxea al últimu vigulineru vivu de la tradición nel conceyu de Piloña, Antonio Espina Montoto (Villar, Espinaréu), y los conciertos van ser en La Benéfica. Actúen Fernando Valle Roso y Silvia Moreno, Llan de Cubel, Los Gascones y los vallisoletanos Alicornio.

Pa completar esti tríu de destacaes cites cola música’l país ta el recién anunciáu Cachufest. Trabáu, nel conceyu de Degaña, acueye esti eventu que va axuntar los díes 22, 23 y 24 de setiembre música, naturaleza, cultura, etnografía y cine. Dientro de la programación tán anunciaos yá los conciertos de 6 Riales, Alienda, Guieldu, Eva Tejedor & Les Pandereteres, Ferla Megía y Llevólu’l Sumiciu. D’esta manera’l festival axunta música tradicional, folk celta, electrónica y pop nun prestosísimu entornu natural.

Mercar discos folk, celta y de gaita na tienda online