Más de 30 actuaciones musicales esti fin de selmana

Aporta otru fin de selmana cola axenda enllena de música asturiana en directo. Les cites tán protagonizaes pol VII Alcuentru Folclóricu d’Ayer, la XIX Seronda d’Avilés. la Fiesta de la Serondaya 2022 en Cenera (Mieres), l’arranque de les II Xornaes Etnográfiques de Grau, y en Xixón la gala del XIV Premiu Camaretá y el décimoprimer conciertu/grabación d’Amosando. Amás, Calea toca en Sotu’l Barcu el vienres, Ochobre en Mieres el sábadu y Lafu y Rebeca el sábadu en L.lena.

El VII Alcuentru Folclóricu d’Ayer va enllenar Morea de cultura asturiana los díes 21, 22 y 23 d’esti mes. El vienres Santi Caleya presenta a les 19h el so llibru L’acompañamientu d’asturianada y a les 22.30h entama la Nueche en Danza amenizada por La Bandina’l Busgosu, La Garrapiella y Pandereteres de Fitoria. Pal sábadu hai desfile a les 17h y a les 18h festival de bandes de gaites cola participación d’Escolinos El Gumial, Vega de Espinareda, Fonte Fuécara y El Teixo-Manolo Quirós. Pa les 22.30h la Banda Gaitas El Gumial cellebra’l so X Aniversariu y a les doce y media la nueche toquen La Tarrancha col so mecigayu-ska. Pa rematar, el domingu van tocar delles bandines pelos chigres.

La Plaza de les Aceñes d’Avilés acueye la diecinueve edición de la Seronda el 21 y 22. La Banda Gaites El Trasno inaugura a les 19.30h les xornaes na que van participar a les 20h los grupos folclóricos Escontra’l Raigañu y Xaréu d’Ochobre, siguíos a les 22h por Eva Tejedor y Les Pandereteres. Pal sábadu 22 La Orquestina la Xarangana entama la folixa a les 12h y dempués hai festival de canción asturiana cola Escuela de Tonada Anabel Santiago. La Banda de Música d’Avilés toca a les 19h, Xuacu Amieva & Dobra a les 20.30h y a les 22h hai Nueche en Danza coles Pandereteres de Fitoria.

Volviendo la pa Cuenca’l Caudal, de vienres a domingu cellébrase la Fiesta de la Serondaya en Cenera (Mieres). A les 20h l’etnógrafu y músicu Xosé Antón Ambás va recibir el Premiu Serondaya y llueu toquen 6 Riales a les 22h. Pal sábadu entama l’amagüestu a les 17h nel que van actuar les bandines Ruxidera, L’Artusu y Los Gascones. A les 20h toca La Bandina’l Busgosu y la nueche remátala L-R col so post-folk asturianu a les 22h.

Otros eventos

Amás d’estos 3 cites qu’axunten una montonera d’actuaciones, en Xixón el Teatru de la Llaboral acueye’l sábadu XIV Premiu Camaretá al Meyor Cantar colos finalistes Algaire, Dixebra y Mostru l’Horru -amás de los conciertos de Tras el Muro y Llevólu’l Sumiciu xunto a Anabel Santiago-, y el domingu Les Naves d’El Natahoyo una nueva grabación d’Amosando con Slum Suit y Mostru l’Horru. En Grau entamen les II Xornaes Etnográfiques con una conferencia de Ricardo Soberado y l’actuación de la Banda Gaites Naranco; Calea toca en Sotu’l Barcu el vienres, Ochobre en Mieres el sábadu y Lafu y Rebeca el sábadu en L.lena. Una axenda mui completa p’amosar que la música asturiana ta mui viva.

*na semeya Pandereteres de Fitoria

Discos de música tradicional y folk a la venta na tienda