Consolídase la denuncia pública fecha pol músicu David Varela esta selmana. El plenu del Ayuntamientu de Tinéu -con mayoría absoluta de PP y Vox– aprobó los presupuestos de 2025 ente los que s’incluye l’amortización de les cuatro places pendientes d’estabilización na Escuela Municipal de Música. D’esta manera, esta institución cultural y educativa va zarrar col modelu d’anguaño, desaniciándose’l serviciu públicu existente. Montserrat Fernández ,alcaldesa de Tinéu, argumentó’l «coste deficitariu» del serviciu pa defender la so decisión y plantegó que van trabayar «nun modelu de collaboración público-privada«.
Nel alderique del plenu –pue vese equí dende’l minutu 22.39 al 37.55– l’alcaldesa plantegó que la Escuela Municipal de Música «cuesta 200.000 € al añu y da unos ingresos de 12.000 €». Sicasí, dende la oposición d’Izquierda Xunida y la FSA cuestionaron estes cifres. La conceyala socialista, Araceli Herrero, retrucó qu’en 2023 «más o menos el gastu foi de 83.000 € y los ingresos de 17.000» y la d’Izquierda Xunida, Marta Menéndez, criticó la «privatización» y amosó la so oposición a «zarrar un serviciu públicu».
Amás, Herrero refirióse al procesu pendiente d’estabilización de les places y cuestionó dende cuándo taben plantegaos estos presupuestos. En respuesta l’alcaldesa alegó a la so capacidá pa tomar decisiones y sorrayó que la intención del Conceyu ye trabayar pola collaboración público-privada y non consolidar la estabilización. Una decisión política que s’axusta a la llegalidá pero que causa que’l Conceyu de Tinéu pierda cuatro puestos de trabayu y que torga nestos momentos el derechu d’accesu a la cultura y a la educación de la población.
Suscríbite a les nuestres novedaes
